
Сям'я – адзінства і любоў?
- Details
- Створана 23.05.2025 14:22
Міжнародны дзень сям'і адзначаецца штогод 15 мая. Свята было заснавана Генеральнай Асамблеяй Арганізацыі Аб'яднаных Нацый у 1993 годзе з мэтай прыцягнення ўвагі шырокай грамадскасці да праблем сям'і, сямейных каштоўнасцей, пытанняў мацярынства і выхавання дзяцей.
Сям'я – самае галоўнае ў жыцці кожнага чалавека. Гэта блізкія і родныя людзі, тыя, каго мы любім, пра каго клапоцімся, каму жадаем дабра і шчасця. Менавіта ў сям'і мы вучымся любові, адказнасці, клопату і павазе.
У рамках мэтавай комплекснай праграмы «Жывое слова мудрасці духоўнай» 21 мая ў бібліятэцы прайшла гадзіна размовы са святаром «Сям'я – адзінства і любоў?»
Навучэнцы Віцебскага дзяржаўнага каледжа культуры і мастацтваў разважалі пра тое, што такое каханне, шлюб, шчаслівая сям'я.
Разабрацца ў гэтых няпростых пытаннях маладым людзям дапамагаў святар Дыянісій Андрэеў, настаяцель храма Уваскрэсення Гасподня. Ён расказаў пра хрысціянскае разуменне сям'і і шлюбу, пра прынцыпы, на якіх будуюцца сямейныя адносіны, падкрэсліў, што любая сям'я павінна пачынацца з кахання, цноты і ўзаемаразумення. Гэтыя дабрадзейнасці здольны не толькі прадухіліць распад сям'і, але і духоўна ўмацаваць яе.
Напрыканцы мерапрыемства ўдзельнікі пазнаёміліся з выданнямі, якія былі прадстаўлены на кніжнай выставе «Сям'я – гэта духоўны пачатак».


































