
Віцебская абласная бібліятэка і фонд «Пакроў»: мастацтва казаць пра галоўнае
- Details
- Створана 28.05.2025 15:41
У сучасным свеце, поўным спакус і хуткіх рашэнняў, няпроста знайсці сэнс жыцця. Менавіта таму лекцыі і сустрэчы, арганізаваныя Віцебскай абласной бібліятэкай імя У. І. Леніна, становяцца своеасаблівым маральным арыенцірам для моладзі.
Сумесна з Дабрачынным фондам падтрымкі сям'і, мацярынства і дзяцінства «Пакроў» супрацоўнікі агульнай чытальнай залы распрацавалі і правялі цыкл мерапрыемстваў, накіраваных на ўдумлівае асэнсаванне важных жыццёвых пытанняў.
Псіхолаг фонду Вераніка Пруднікава на працягу года праводзіла заняткі з навучэнцамі Віцебскага дзяржаўнага тэхнічнага каледжа і Віцебскага дзяржаўнага медыцынскага каледжа, прапаноўваючы задумацца над пытаннямі «У чым сэнс жыцця?», «Што значыць любіць?», «Якія каштоўнасці робяць сям'ю моцнай?» Маладыя людзі актыўна абмяркоўвалі, чаму важна разумець розніцу паміж каханнем і закаханасцю, навошта патрэбны такія паняцці, як мужнасць і жаноцкасць, і якім чынам традыцыйныя сямейныя каштоўнасці дапамагаюць будаваць шчаслівыя саюзы.
Фінальная падзея цыкла – гульня-дыялог «Каханне. Сям'я. Шчасце» – адбылася 27 мая ў абласной бібліятэцы. У састаў экспертнага журы ўвайшлі протаіерэй Ігар Машкей, вопытны псіхолаг Іна Слуцкая і таленавіты аўтар-выканаўца Пётр Захараў. Кожны з экспертаў падзяліўся асабістым вопытам пабудовы сямейнага шчасця, нагадаўшы ўдзельнікам, наколькі важнымі з'яўляюцца паразуменне, падтрымка і вернасць.
Віктарына прымусіла ўдзельнікаў шукаць правільныя адказы ў зносінах адзін з адным. Пераможца быў абраны па колькасці атрыманых балаў. Але выйграў кожны ўдзельнік, які атрымаў каштоўныя парады і вопыт зносін на важнейшыя тэмы.


































