
Падарожжа ў часе і кветкавае натхненне
- Details
- Створана 25.06.2025 16:45
У час летніх канікул бібліятэка стала не толькі цэнтрам ведаў і творчасці, але і месцам, поўным дзіўных адкрыццяў і натхнення для вучняў летніх школьных лагераў.
Аддзел перыядычных выданняў падрыхтаваў для юных наведвальнікаў серыю майстар-класаў, кожны з якіх стаў крокам у захапляючае падарожжа. Першым этапам гэтай прыгоды стала знаёмства з загадкавым светам дыназаўраў. З дапамогай яркіх ілюстрацый, захапляльных апавяданняў і пазнавальных фільмаў рабяты перанесліся ў далёкае мінулае нашай планеты, даведаўшыся пра розныя віды гэтых гіганцкіх яшчараў, іх лад жыцця і прычыны іх знікнення.
Каб замацаваць атрыманыя веды, супрацоўнікі аддзела правялі майстар-клас па аплікацыі, дзе кожнае дзіця змагло стварыць свайго ўласнага дыназаўра. Каляровая папера, вязальныя ніткі, нажніцы і клей ператварыліся ў чароўныя прылады, а юныя даследнікі з захапленнем увасаблялі свае фантазіі ў жыццё, ствараючы ўнікальныя працы, поўныя яркіх колераў і арыгінальных формаў.
Наступным этапам стала паглыбленне ў свет «Кветкавай фантазіі». Гэты майстар-клас быў накіраваны на развіццё творчых здольнасцей юных удзельнікаў праз тэхніку «ленд-арт» – мастацтва стварэння карцін з прыродных матэрыялаў. Дзеці акунуліся ў свет яркіх фарбаў і нестандартных рашэнняў, асвойваючы тэхніку стварэння аб'ёмных кветкавых кампазіцый. Кожны ўдзельнік змог праявіць сваю індывідуальнасць, выкарыстоўваючы сабраныя кветкі і лісце.
Летнія канікулы ў бібліятэцы сталі не толькі часам адпачынку, але і сапраўднай крыніцай натхнення, дзе веды і творчасць перапляліся ў яркім калейдаскопе эмоцый і ідэй.


































