
Слова клікала ў бой…
- Details
- Створана 11.07.2025 15:48
Добрай традыцыяй фестывальнага лета стала знаёміць віцябчан і гасцей горада з унікальнымі выданнямі і дакументамі з фондаў бібліятэк-партнёраў. У рамках XXXIV Міжнароднага фестывалю мастацтваў «Славянскі базар у Віцебску» Нацыянальная бібліятэка Беларусі і Віцебская абласная бібліятэка імя У. І. Леніна аб'ядналі намаганні і прадставілі 10 ліпеня некалькі падзей. Усе яны прымеркаваны да 80-годдзя Вялікай Перамогі.
Адкрыла праграму прэзентацыя перасовачнага выставачнага праекта «Роля народаў СССР у Вялікай Перамозе». Праект прысутным прадставіла намеснік генеральнага дырэктара Нацыянальнай бібліятэкі Беларусі Людміла Высоцкая. Яна падкрэсліла унікальнасць выставачнага праекта – у яго падрыхтоўцы прынялі ўдзел 14 бібліятэк – членаў Бібліятэчнай Асамблеі Еўразіі. У экспазіцыю ўвайшлі матэрыялы з Беларусі, Расіі, Таджыкістана, Узбекістана, Кыргызстана, Казахстана і Азербайджана. У стварэнні кожнага з 18 планшэтаў выкарыстаны картаграфічныя і фотаматэрыялы, дакументы і выяўленчыя выданні (паштоўкі, маркі), унікальныя і не публікаваныя раней матэрыялы.
Намеснік Дзяржаўнага сакратара Саюзнай дзяржавы Алена Богдан у сваім выступленні адзначыла, што захаванне гістарычнай праўды аб подзвігу савецкага народа – той важны напрамак, па якім ідуць народы Беларусі і Расіі. Яна перадала ў дар Віцебскай абласной бібліятэцы новую кнігу «Защищая Отечество: дорога к маю 1945» з серыі «Библиотека Созного государства».
Ва ўрачыстым адкрыцці выстаўкі прынялі ўдзел намеснік начальніка аддзела работы арганізацый сферы культуры Віцебскага аблвыканкама Алег Агееў, каардынатар выставачнай праграмы Міжнароднага фестывалю мастацтваў «Славянскі базар» Алена Сярова, дырэктар бібліятэкі Таццяна Адамян.
Працягнула праграму мерапрыемстваў адкрыццё выставы «Па старонках падпольнага друку 1941–1945 гг.» у зале «Ex Libris». Экспазіцыя знаёміць з унікальнымі дакументамі з фондаў Нацыянальнай бібліятэкі Беларусі – узорамі партызанскага друку, асобнымі нумарамі падпольнай газеты «Віцебскі рабочы», а таксама самаробнымі часопісамі партызанскіх брыгад, якія распаўсюджваліся на тэрыторыі Беларусі і звязаны з вызваленчай барацьбой Віцебшчыны ў 1941–1945 гг. Аглядную экскурсію па выставе для прысутных правяла загадчык НДА кнігазнаўства Нацыянальнай бібліятэкі Беларусі Марыя Шопіна.
Завяршыў праграму гэтага дня ў Віцебскай абласной бібліятэцы круглы стол «Памяць пакаленняў: лічбавая гісторыя Перамогі».
У холе бібліятэкі экспанавалася мабільная выстава «Страницы Победы» абласной газеты «Витебские вести». На 15 планшэтах – інфармацыя пра тое, як выдавалі газету ў гады вайны, якім быў нумар «Віцебскага рабочага» 9 мая 1945-га, хто падзяліўся з газетай успамінамі пра сустрэчу на Эльбе, як у Віцебску адкрывалі плошчу Перамогі і ўзводзілі мемарыял «Прарыў» ва Ушачах, успаміны ветэранаў, рэпартажы з парадаў і ўрачыстасцяў з нагоды 30-й, 40-й, 50-й, 60-й і 70-й гадавіны заканчэння Вялікай Айчыннай вайны.


































