
Лекцыя кампазітара Аляксандра Іванова «Пра што нам расказвае музыка»
- Details
- Створана 17.10.2025 15:53
Лекцыя кампазітара Аляксандра Іванова ў рамках бібліятэчнага праекта «Музыка для ўсіх», прысвечаная творчасці выдатнага сучаснага кампазітара Барыса Цішчанкі, адбылася 16 кастрычніка ў аддзеле літаратуры па мастацтве.
Тэмай сустрэчы стала сімфонія № 5 з унікальнай харэа-сімфанічнай цыкліяды «Беатрычэ». Твор пецярбургскага кампазітара Барыса Цішчанкі – сачыненне, якое не мае аналагаў у сусветнай музычнай літаратуры. Сімфонія-балет на сюжэт «Боскай камедыі» Дантэ, агульнай працягласцю больш за тры гадзіны, складаецца з пяці паўнавартасных сімфоній. Кожная з іх мае дакладную праграму: першая прысвечана зямному жыццю Дантэ, другая і трэцяя апісваюць кругі Ада, чацвёртая – Чысцец, пятая – Рай. Праца над сачыненнем доўжылася з 1996 па 2005 год. Аўтарам прадугледжана канцэртнае выкананне сімфоній па асобнасці.
Удзельнікі мерапрыемства даведаліся пра гісторыю стварэння і праслухалі пятую частку цыкліяды «Рай». Аляксандр Віктаравіч прадэманстраваў, як Барысу Цішчанку ўдалося перадаць у музыцы філасофскія і духоўныя шуканні Дантэ, яго каханне і трагедыю.
Лекцыя дазволіла слухачам паглядзець на знаёмы музычны твор інакш, падкрэсліўшы непаўторны талент кампазітара і раскрыўшы яго значную ролю ў развіцці сусветнага музычнага мастацтва.


































