
Віцебская бібліятэка ў цэнтры культурных дыялогаў
- Details
- Створана 27.10.2025 10:15
Віцебская абласная бібліятэка імя У. І. Леніна прыняла ўдзел у XII Міжнародным кангрэсе «Бібліятэка як феномен культуры», прысвечаным 80-годдзю Перамогі ў Вялікай Айчыннай вайне. Мерапрыемства адбылося 23–24 кастрычніка 2025 года ў Нацыянальнай бібліятэцы Беларусі ў Мінску.
Арганізатарамі кангрэса выступілі Міністэрства культуры Рэспублікі Беларусь і Нацыянальная бібліятэка Беларусі пры падтрымцы Міждзяржаўнага фонду гуманітарнага супрацоўніцтва дзяржаў - удзельніц СНД, Міністэрства інфармацыі Рэспублікі Беларусь і Беларускай бібліятэчнай асацыяцыі. У рамках мерапрыемства сабраліся дэлегаты з 17 краін з розных кантынентаў: кіраўнікі і спецыялісты бібліятэк, музеяў, архіваў, навукова-даследчых арганізацый, адукацыйных устаноў, выдавецтваў, прадстаўнікі дзяржаўных структур і грамадскіх арганізацый.
Асноўныя тэмы абмеркавання ў рамках секцый і круглых сталоў уключалі ролю бібліятэк у захаванні гістарычнай памяці аб Вялікай Айчыннай вайне, перспектывы развіцця бібліятэчнай адукацыі, прасоўванне кнігі і чытання, фарміраванне патрыятычных каштоўнасцей у дзяцей і моладзі, праектныя ініцыятывы і сацыякультурныя практыкі ўстаноў культуры і адукацыі бібліятэчнай дзейнасці.
Загадчыца агульнай чытальнай залы Таццяна Патоцкая выступіла на секцыі «Бібліятэка, архіў, музей як месца захавання гістарычнай памяці аб Вялікай Айчыннай вайне» з дакладам «Ваенныя дарогі бібліятэкараў Віцебшчыны». У сваім выступленні яна расказала аб стварэнні гэтага мультымедыйнага рэсурсу, вылучыла ключавыя аспекты, асаблівасці і значнасць праекта для Віцебскага рэгіёну, падкрэсліла важнасць захавання гістарычнай памяці праз сучасныя інфармацыйныя тэхналогіі.
Удзел у кангрэсе дазволіў Віцебскай абласной бібліятэцы абмяняцца вопытам з калегамі, пашырыць прафесійныя сувязі і ўнесці ўклад у развіццё культурна-асветніцкай дзейнасці, прысвечанай гераічнаму мінуламу.


































