
Экспертны ўдзел Віцебскай абласной бібліятэкі ў Пакроўскай канферэнцыі
- Details
- Створана 04.11.2025 09:24
У Віцебску прайшла гарадская Пакроўская гісторыка-краязнаўчая навукова-практычная канферэнцыя. Супрацоўнікі абласной бібліятэкі актыўна ўдзельнічалі ў яе рабоце, выступаючы ў ролі экспертаў пры разглядзе навуковых даследаванняў і творчых праектаў школьнікаў і выкладчыкаў.
Агульнай тэмай прадстаўленых работ сталі захаванне духоўнай і гістарычнай спадчыны рэгіёна, выхаванне патрыятызму і грамадзянскай адказнасці сярод маладога пакалення.
Арганізатарамі выступілі аддзел па адукацыі Віцебскага гарадскога выканаўчага камітэта, аддзел рэлігійнай адукацыі і катэхізацыі Віцебскай дыяцэзіі, а таксама Віцебскі гарадскі цэнтр дадатковай адукацыі дзяцей і моладзі.
Першы этап у фармаце гарадской дзіцяча-юнацкай канферэнцыі «Праваслаўнае краязнаўства на зямлі Віцебскай» адбыўся 28 кастрычніка. У складзе журы бібліятэкар агульнай чытальнай залы Кацярына Панкевіч ацэньвала выступленні навучэнцаў старэйшых класаў сярэдніх школ Віцебска. 29 маладых даследчыкаў ва ўзросце ад 14 да 18 гадоў, якія прадстаўляюць установы агульнай і дадатковай адукацыі, дэманстравалі свае веды і даследчыя праекты, прысвечаныя розным аспектам духоўнага жыцця, гісторыі рэгіёна і культурнай спадчыне Віцебска.
Загадчык агульнай чытальнай залы Таццяна Патоцкая 30 кастрычніка брала ўдзел у рабоце журы і ацэньвала выступленні педагогаў сярэдніх школ у рамках Віцебскай гарадской навукова-практычнай канферэнцыі «Духоўна-маральнае развіццё і адукацыя як аснова выхавання грамадзяніна і патрыёта Беларусі: вопыт, праблемы і перспектывы».
Для супрацоўнікаў Віцебскай абласной бібліятэкі ўдзел у рабоце журы дазволіў не толькі рэалізаваць свае прафесійныя навыкі ў галіне ацэнкі навуковых работ, але і абмеркаваць прафесійныя пытанні з калегамі з адукацыйных і рэлігійных устаноў. Абласная бібліятэка ўмацоўвае свой статус надзейнага партнёра ў арганізацыі значных ініцыятыў, накіраваных на фарміраванне духоўнай культуры і маральных каштоўнасцей моладзі.


































