
Восеньскія канікулы ў бібліятэцы
- Details
- Створана 12.11.2025 11:13
Падчас праекта «Восеньскія канікулы ў бібліятэцы» больш за 400 дзяцей з розных школ Віцебска запоўнілі ўтульныя залы абласной бібліятэкі, дзе іх чакалі пазнавальныя віктарыны і квізы, разнапланавыя экскурсіі і творчыя майстар-класы, а таксама батлеечны спектакль.
Інтэрактыўная экскурсія «Бібліятэка і...» стала сапраўдным адкрыццём для школьнікаў. Разам з супрацоўнікамі агульнай чытальнай залы юнакі і дзяўчаты наведалі розныя аддзелы бібліятэкі і выконвалі эксклюзіўныя заданні, звязаныя з жыццём і творчасцю Аляксандра Пушкіна. Такі фармат дазволіў паглыбіць веды пра літаратурную спадчыну паэта, пра яго асабістыя гастранамічныя і мастацкія перавагі, а таксама пра сувязь з Віцебскам.
Прэм'ерны паказ батлеечнага спектакля «Дары сэрца» адбыўся ў рамках праекта «Даступна аб вечным: прытчы». Выхаванцы школьных лагераў горада змаглі дакрануцца да мудрасці прытчы, якая вучыць сапраўднай шчодрасці і адкрытасці.
Для віктарыны «Беларусь у маім сэрцы!» аддзел маркетынгу і сацыякультурнай дзейнасці падрыхтаваў заданні для тураў «У пошуках беларускіх цудаў» і «Прагулка па Віцебску». Першы праверыў веды аб галоўных сімвалах і славутасцях краіны. Другі тур перанёс удзельнікаў у захапляльнае падарожжа па родным горадзе, дзе яны ўспаміналі яркія старонкі гісторыі і знаёміліся з выдатнымі асобамі, якія праславілі Віцебск. Завяршылася віктарына творчым заданнем – кожны ўдзельнік вырабіў закладку-абярэг з беларускім арнаментам.
Дзіцячы аддзел праводзіў гульнявую праграму «Скарбы дракона». Школьнікі сталі сапраўднымі паляўнічымі за гэтымі дзіўнымі істотамі. Рухомыя гульні, заснаваныя на ведах і знаходлівасці, дазволілі хлопчыкам і дзяўчынкам атрымаць «драконавыя скарбы», выкарыстоўваючы кнігі з фонду бібліятэкі – падручнікі драконазнаўства і энцыклапедыі пра розныя віды драконаў.
Кніжны кот Фаліянт і яго сябры ніколі не даюць сумаваць юным наведвальнікам аддзела рэдкай кнігі. Разам яны падарожнічаюць па бібліятэчных залах, знаёмячы школьнікаў з героямі розных літаратурных твораў. У аддзеле абанемента дзеці дапамагалі прафесару Муру складаць чалавеча-каціны размоўнік, у аддзеле краязнаўства сустракаліся з беларускай паэзіяй у кампаніі ката Якуба, а ў дзіцячым аддзеле хлопцы дапамагалі Кату Вучонаму ўспомніць герояў знакамітых казак. У творчай майстэрні «Вясёлая катавасія» юнакі і дзяўчаты паспяхова справіліся з задачай стварыць Казачнага ката сваімі рукамі.
Але самыя яркія ўражанні атрымалі ўдзельнікі літаратурнага квэста «Краіна Цудаў. Па слядах Алісы». Дзеці перанесліся ў сапраўдную Краіну цудаў, дзе пазнаёміліся з Чырвонай Каралевай, Белым Трусам і Чэшырскім катом. Яны сталі ўдзельнікамі Вар'яцкага чаявання, прайшлі мноства вясёлых выпрабаванняў і расшыфравалі таемнае пасланне. У выставачнай зале «Ex Libris» іх чакала знаёмства з рознымі выданнямі знакамітай казкі Люіса Кэрала. Дзеці ўбачылі, як мяняўся вобраз Алісы і навакольнага яе свету на працягу часу, а таксама даведаліся цікавыя факты з гісторыі стварэння і публікацыі кнігі.
У аддзеле літаратуры па мастацтве тэмай займальных майстар-класаў стала «Ціхае паляванне». Удзельнікі даведаліся, якія грыбы ядомыя, а якія атрутныя і патрабуюць асцярожнасці. На памяць аб гэтым знаёмстве дзеці стварылі незвычайныя вырабы ў змешанай тэхніцы, выкарыстоўваючы паперу і пражу.
Аддзел перыядычных выданняў арганізаваў майстар-класы ў тэхніцы арыгамі. Школьнікі вучыліся працаваць з паперай і фааміранам, праяўляць крэатыўнасць і фантазію, а таксама радавацца вынікам сваёй працы. Пасля заканчэння заняткаў кожны ўдзельнік мог забраць дадому свой уласны выраб – яркі напамін пра канікулы, поўныя творчасці і новыя адкрыцці.
Восень скончылася, наперадзе зіма – самая чароўная пара года. Абласная бібліятэка зноў ужо рыхтуе праграму мерапрыемстваў з захапляльнымі майстар-класамі і цікавымі сустрэчамі з любімымі літаратурнымі героямі. Разам мы будзем ствараць, даследаваць і адчыняць новыя гарызонты ў свеце кніг і творчасці.


































