
Лабараторыя поспеху: сустрэча аб кар'еры ў дызайне
- Details
- Створана 19.11.2025 16:16
У Віцебскай абласной бібліятэцы прайшла сустрэча ў рамках праекта «Лабараторыя поспеху: ад ідэі да бізнесу», прысвечаная магчымасцям прафесійнага шляху ў сферы дызайну.
Віцебск – горад з багатай культурнай гісторыяй, дзе зарадзілася мноства талентаў. Сёння тут дзейнічае Віцебскі дзяржаўны тэхналагічны ўніверсітэт, факультэт дызайну якога рыхтуе спецыялістаў, здольных увасабляць самыя смелыя ідэі і развіваць сучаснае мастацтва і індустрыю моды.
Госцем сустрэчы стала Марына Варахобка – старшы выкладчык кафедры дызайну і моды, кіраўнік студыі брэндынгу і дызайну «Дадызайн», член Беларускага саюза дызайнераў. Яна падзялілася сакрэтамі свайго творчага шляху, расказала пра першыя крокі ў мастацтве, пра праекты для вядомых брэндаў і пра тое, як удзел у конкурсах і выставах дапамагае расці і заяўляць пра сябе.
Сустрэча пачалася з інтэрактыўнай віктарыны: школьнікі ўзгадвалі гісторыю дызайну і рэкламы, даведваліся цікавыя факты аб брэндах і рэкламных кампаніях. Пасля ўдзельнікі пагрузіліся ў свет колеру і формы, абмяркоўваючы ролю дызайну ў сучасным грамадстве.
У ходзе сустрэчы госця адказала на пытанні і падкрэсліла: поспех у прафесіі немагчымы без настойлівасці, арыгінальнасці і пастаяннага навучання. Яе парады натхнілі хлопчыкаў і дзяўчынак задумацца аб будучыні і аб тым, як рэалізаваць свае творчыя ідэі. Многіх з іх зацікавілі выданні на тэматычнай кніжнай выставе аб напрамках дызайну – ад графічнага і прамысловага да моднага і інтэр'ернага.
Мерапрыемства выклікала жывы водгук у школьнікаў і стала важным крокам у іх знаёмстве са светам прафесійнага дызайну. Упэўнены, што такія сустрэчы дапамогуць маладым людзям знайсці свой шлях і раскрыць творчы патэнцыял.


































