
Лабараторыя поспеху: газета «Витебские вести»
- Details
- Створана 03.12.2025 13:32
У сучасную эпоху, калі інтэрнэт і сацыяльныя сеткі адыгрываюць найважнейшую ролю ў інфармацыйнай прасторы, многія лічаць, што традыцыйная прэса паступова саступае на другі план. Аднак газета «Витебские вести» дэманструе адваротнае: яна прайшла доўгі шлях развіцця, захавала сваю актуальнасць і паспяхова адаптавалася да новых умоў, сумяшчаючы правераныя часам традыцыйныя метады з сучаснымі тэхналогіямі.
У рамках праекта «Лабараторыя поспеху» 2 снежня адбылася займальная сустрэча з прадстаўнікамі абласной газеты «Витебские вести». Навучэнцы сярэдняй школы № 11 імя М. М. Бахціна атрымалі ўнікальную магчымасць пазнаёміцца з адной са старэйшых і найбольш аўтарытэтных рэгіянальных газет Беларусі.
У рамках мерапрыемства супрацоўнікі бібліятэкі правялі гістарычны квіз, асноўная мэта якога – не толькі праверыць веды ўдзельнікаў, але і пазнаёміць маладых людзей з цікавымі фактамі з гісторыі друкаваных выданняў, а таксама з этапамі станаўлення «Витебских вестей» з моманту заснавання ў 1917 годзе і іх далейшай трансфармацыяй да сённяшняга дня.
Намеснік галоўнага рэдактара Юлія Новікава падрабязна расказала пра тое, як сучасныя інфармацыйныя тэхналогіі мяняюць працу ў рэдакцыі. Яна адзначыла, што выкарыстанне нейрасетак дазваляе значна паскорыць працэсы падрыхтоўкі матэрыялаў, павысіць іх якасць і забяспечыць больш дакладную адпаведнасць сучасным патрабаванням аўдыторыі.
Школьнікам былі прадэманстраваны найбольш цікавыя праекты, створаныя з дапамогай штучнага інтэлекту. Госця падкрэсліла, што нейрасеткі не змогуць поўнасцю замяніць работу чалавека, калі імкнуцца да прафесіяналізму і якасці ў сваёй сферы.
Юлія Аляксандраўна распавяла, што сёння рэдакцыя «Витебских вестей» – буйны медыяхолдынг, які ўключае аднайменную газету, раённыя выданні «Гарадоцкі веснік» і «Кліч Радзімы», кругласутачнае сеткавае выданне vitvesti.by. Таксама ў структуру ўваходзіць Медыяцэнтр Віцебскай вобласці, які служыць пляцоўкай для канструктыўнага дыялогу паміж органамі ўлады, установамі і прадпрыемствамі рэгіёна са СМІ.
Ужо некалькі гадоў функцыянуе Медыялабараторыя, якая дае падлеткам унікальную магчымасць пазнаёміцца з асновамі журналісцкага майстэрства, атрымаць практычныя навыкі ў сферы медыя і падрыхтавацца да паступлення ў профільныя ВНУ.
Карэспандэнт Елізавета Дзяткоўская ўсяго некалькі месяцаў працуе ў рэдакцыі пасля заканчэння ўніверсітэта, але за гэты кароткі час у маладога спецыяліста ўжо ёсць чым падзяліцца з удзельнікамі сустрэчы. Яна расказала пра свае першыя крокі ў прафесійнай кар'еры і пра ўдзел у цікавых праектах, дзякуючы якім змагла значна пашырыць свой прафесійны вопыт.
Рэдактар аддзела інтэрнэт-праектаў Яна Волкава ў сваю чаргу падзялілася ўласнымі сакрэтамі штодзённай работы. Яна падкрэсліла важнасць крэатыўнага падыходу да сваёй работы і пастаяннага пошуку новых фарматаў падачы інфармацыі.
Такая насычаная і змястоўная сустрэча не толькі пазнаёміла школьнікаў са структурай і сучаснымі напрамкамі работы рэдакцыі «Витебских вестей», але і дала ім каштоўныя веды. Моладзь даведалася, як інавацыйныя тэхналогіі і актыўнае ўзаемадзеянне з аўдыторыяй дапамагаюць рэалізоўваць ідэі ў галіне масавых камунікацый, а таксама зразумелі важнасць захавання прафесійных стандартаў у эпоху лічбавых перамен.


































