
Прафесіяналізм, захопленасць і вясновае натхненне: ушаноўванне лепшых супрацоўнікаў Віцебскай абласной бібліятэкі
- Details
- Створана 05.03.2026 11:27
Напярэдадні цудоўнага вясновага свята – Дня жанчын – у Віцебскай абласной бібліятэцы адбылася яшчэ адна знакавая падзея. За шматгадовую добрасумленную працу і значны ўклад у развіццё культуры рэгіёну нашы калегі былі ўдастоены высокіх узнагарод – Ганаровых грамат упраўлення культуры Віцебскага абласнога выканаўчага камітэта.
Уручаючы ўзнагароды, Зоя Гукава, галоўны спецыяліст аддзела работы арганізацый сферы культуры ўпраўлення культуры Віцебскага аблвыканкама, падкрэсліла, што менавіта такія прафесіяналы з'яўляюцца фундаментам культурнага жыцця Віцебшчыны. Дырэктар абласной бібліятэкі Таццяна Адамян далучылася да віншаванняў, адзначыўшы, што за кожнай граматай стаіць неверагодная адданасць справе, ініцыятыўнасць і шчырая любоў да кнігі.
Асаблівыя словы прызнання ў гэты дзень гучалі на адрас загадчыцы аддзела рэдкай кнігі Вольгі Лебедзевай. Менавіта пры непасрэдным удзеле Вольгі Фёдараўны ў 2022 годзе ў нашай бібліятэцы быў створаны гэты ўнікальны аддзел.
Дзякуючы яе энергіі і глыбокім ведам былі аператыўна сфарміраваны асноўны і навукова-даведачны фонды аддзела, арганізавана работа супрацоўнікаў па навуковым апісанні дакументаў і стварэнні даведачна-бібліяграфічнага апарата. Сапраўднай «жамчужынай» бібліятэкі стала выставачная зала «Ex Libris», праекты якой даступна і цікава папулярызуюць гісторыю кніжнай справы для кожнага чытача.
Высокай узнагародай быў адзначаны прафесіяналізм эканаміста 1-й катэгорыі Вольгі Сокалавай. Эфектыўная работа сучаснай бібліятэкі немагчыма без граматнай фінансава-эканамічнай стратэгіі.
Вольга Леанідаўна распрацавала і ўкараніла шэраг мер, якія далі магчымасць аптымізаваць работу бухгалтэрыі і забяспечыць правядзенне працэдур дзяржаўных закупак і поўнае выкарыстанне выдзеленых і дадаткова запытаных бюджэтных асігнаванняў.
Мы ад усёй душы віншуем Вольгу Фёдараўну і Вольгу Леанідаўну з заслужанымі ўзнагародамі! Ваша работа – гэта прыклад таго, як прафесійнае майстэрства ператвараецца ў мастацтва служэння культуры.
Таксама віншаванні і прыемныя падарункі ад пярвічнай прафсаюзнай арганізацыі Віцебскай абласной бібліятэкі імя У. І. Леніна Беларускага прафесійнага саюза работнікаў культуры, інфармацыі, спорту і турызму атрымалі ўсе супрацоўніцы абласной бібліятэкі.
У гэтыя вясновыя дні жадаем усім невычэрпнага натхнення, новых творчых вышынь, моцнага здароўя і цяпла. Няхай кожны ваш дзень будзе напоўнены прызнаннем калег і ўдзячнымі ўсмешкамі чытачоў!


































