
Магія іерогліфаў: у абласной бібліятэцы праходзяць творчыя майстэрні па кітайскай каліграфіі
- Details
- Створана 13.03.2026 09:24
Чытачы абласной бібліятэкі 10 сакавіка дакрануліся да старажытнага мастацтва Усходу. Творчую майстэрню правялі магістранты Віцебскага дзяржаўнага ўніверсітэта імя П. М. Машэрава – Лі Шыюй і Цзэн Цюі.
Удзельнікі самых розных узростаў часова змянілі звыклыя ручкі на пэндзлі і туш. Праграма сустрэчы атрымалася насычанай: госці даведаліся пра багатую гісторыю і ўнікальныя асаблівасці кітайскага пісьменства, пазнаёміліся з рознымі тэхнікамі і інструментамі. Асабліва каштоўным стала адкрыццё сакрэтаў правільнага трымання пэндзля і выкарыстанні адмысловых чарнілаў. У выніку пад кіраўніцтвам Лі Шыюй і Цзэн Цюі кожны змог вывесці свае першыя іерогліфы і напісаць сваё імя.
Для многіх гэта быў першы досвед знаёмства з культурай Кітая, які падарыў не толькі новыя навыкі, але і задавальненне ад медытатыўнага працэсу. Нягледзячы на складанасць тэхнікі, у канцы занятку кожны ўдзельнік прадставіў сваю каліграфічную работу.
Сустрэчы ў аддзеле выданняў на замежных мовах – найлепшы спосаб умацаваць культурныя сувязі і знайсці новых сяброў.
Сачыце за нашымі анонсамі, каб не прапусціць наступныя заняткі!


































