
Архітэктурны код будучыні: у «Лабараторыі поспеху» абмеркавалі аблічча Віцебска
- Details
- Створана 01.04.2026 10:07
Сустрэча, якая аб'яднала энергію моладзі і досвед стваральнікаў нашага горада, адбылася 30 сакавіка ў рамках праекту «Лабараторыя поспеху: ад ідэі да бізнэсу».
Галоўным спікерам выступіла Святлана Рыбакова, намеснік галоўнага архітэктара УП «Інстытут Віцебскграмадзянпраект».
Архітэктура – гэта не проста чарцяжы, гэта застылы летапіс, дзе гісторыя і культура сплятаюцца з тэхналогіямі будучыні. Менавіта гэты пасыл стаў лейтматывам гутаркі з навучэнцамі школы № 11 імя М. М. Бахціна.
Святлана Мікалаеўна, аўтар знакавых для кожнага віцябляніна праектаў – ад утульных вуліц Суворава, Талстога і Гогаля да маштабнага абнаўлення «Віцебск Атэля», праекта дэталёвай планіроўкі квартала жылых дамоў па вуліцы Новааршанскай і забудовы жылога раёна «Тарны», – падзялілася сакрэтамі прафесійнага майстэрства. Яна распавяла, як нараджаюцца ідэі, якія змяняюць аблічча горада, і чаму выбар жыццёвага шляху для старшакласніка – гэта падмурак, на якім будуецца ўвесь будучы лёс.
Сустрэча прайшла ў фармаце адкрытага дыялога: ад тонкасцей горадабудаўніцтва да амбіцыйных планаў на будучыню. Жывыя зносіны з прафесіяналам, які літаральна «малюе» сучасны Віцебск, сталі для рабят не проста ўрокам прафарыентацыі, а сапраўдным натхненнем на шляху да ўласных вяршынь.


































