
«Чырвоны мост» – дарога да памяці: у бібліятэцы прайшла творчая сустрэча з Навумам Гальпяровічам
- Details
- Створана 23.04.2026 13:07
Цёплая і душэўная сустрэча з вядомым пісьменнікам, журналістам і заслужаным дзеячам культуры Рэспублікі Беларусь Навумам Гальпяровічам адбылася 16 красавіка ў абласной бібліятэцы. Галоўнай падставай для размовы стала прэзентацыя яго новага рамана-эсэ «Чырвоны мост».
Для жыхароў Полацка Чырвоны мост – месца гістарычнае, але для аўтара гэта, найперш глыбока асабісты, сакральны сімвал. У сваёй кнізе Навум Якаўлевіч вяртае чытача ў горад свайго дзяцінства і юнацтва, дзелячыся гісторыямі пра першае каханне, дакладнае сяброўства і першыя крокі ў журналістыцы.
У гэты вечар зала напоўнілася ўспамінамі. Навум Гальпяровіч шчыра расказваў пра людзей, якія акружалі яго ў Полацку і Віцебску, фарміруючы яго як творчую асобу.
Сваімі ўражаннямі аб рамане «Чырвоны мост» падзяліліся дырэктар Інстытута мовазнаўства імя Якуба Коласа НАН Беларусі, кандыдат філалагічных навук, дацэнт Ігар Капылоў і вядучая сустрэчы, загадчык аддзела краязнаўства Ларыса Рагачова.
Анатоль Гармаза, мастак-карыкатурыст, генеральны дырэктар ТАА «Рэдакцыя газеты "Шапакляк"», дадаў сустрэчы яркіх фарбаў, прадэманстраваўшы сяброўскія шаржы на аўтара.
Павіншаваць пісьменніка прыйшлі сябры і калегі: мастак Міхаіл Ляўковіч, заслужаны артыст Рэспублікі Беларусь Пётр Ламан, журналіст Святлана Дзядзінкіна і краязнаўца Людміла Хмяльніцкая. Самым кранальным момантам стала з'яўленне гасцей з роднага для аўтара Полацка – сястры пісьменніка і дэлегацыі бібліятэкараў Цэнтральнай раённай бібліятэкі імя Ф. Скарыны.
Новая кніга «Чырвоны мост» ужо паступіла ў фонд бібліятэкі і чакае сваіх чытачоў. Гэта выданне для тых, хто хоча адчуць атмасферу мінулага і разам з аўтарам прайсціся па дарогах памяці.


































