
Праект «Коласаўцы»: творчы вечар актрысы Святланы Жукоўскай
- Details
- Створана 23.04.2026 15:08
У рамках праекта «Коласаўцы», прымеркаванага да 100-годдзя Нацыянальнага акадэмічнага драматычнага тэатра імя Якуба Коласа, у абласной бібліятэцы прайшла творчая сустрэча з вядучым майстрам сцэны, уладальніцай прыза Беларускага саюза тэатральных дзеячаў «Крыштальная зорка» Святланай Жукоўскай.
Вечарына ператварылася ў сапраўднае свята тэатра, паэзіі і музыкі. Высокі ўзровень прафесійнага майстэрства, вялікі ўклад Святланы Жукоўскай у культуру горада адзначыла начальнік аддзела культуры Віцебскага гарвыканкама Наталля Шыянок і старшыня Віцебскага гарадскога савета Беларускага грамадскага аб'яднання ветэранаў Ларыса Аленская.
Гераіня вечара падзялілася ўспамінамі аб вучобе ў легендарным Дзяржаўным інстытуце тэатральнага мастацтва на курсе народнай артысткі СССР Эліны Быстрыцкай і сваім прыходзе ў коласаўскі тэатр у 1982 годзе. Святлана Жукоўская расказала аб рабоце з рэжысёрамі Юрыем Пахомавым, Аляксандрам Дольнікавым, Віталем Баркоўскім, Валерыем Анісенкам, якія ў розныя гады ставілі спектаклі з яе ўдзелам. Літаратурны рэдактар тэатра Юрась Іваноўскі дапамог гасцям узгадаць самыя яркія ролі Святланы Мікалаеўны, прадставіўшы відэазапісы архіўных і сучасных пастановак.
Атмасфера ў зале была па-сямейнаму цёплай дзякуючы ўдзелу калег і сяброў. Мастацкі кіраўнік тэатра Канстанцін Ганчароў падкрэсліў запатрабаванасць актрысы, адзначыўшы, што сёння яна занята практычна ва ўсіх яго пастаноўках. Заслужаныя артысты Беларусі Вячаслаў Грушоў і Галіна Букаціна ўзгадалі кур'ёзныя і кранальныя моманты сумеснай работы. Святлана Дашкевіч паднесла ўнікальны падарунак – верш, у які па-майстэрску ўпляла назвы ўсіх спектакляў з удзелам віноўніцы ўрачыстасці.
Акрамя калег-акцёраў, павіншаваць Святлану Жукоўскую прыехалі госці з іншых гарадоў і ўстаноў: з Оршы прыбыў святар Аляксандр Лапцеў, а рэжысёр Святлана Пацянкова і юныя артысты Цэнтра творчасці дзяцей і моладзі Віцебскага раёна падрыхтавалі для любімай актрысы спецыяльную праграму.
Музычным упрыгожаннем вечарыны стала выступленне трыа Святланы Жукоўскай, Наталлі Аладкі і Раісы Грыбовіч. Праніклівае выкананне песні «Зоркі» не пакінула абыякавым ніводнага гледача. Завяршаючы сустрэчу, Святлана Жукоўская прызналася, што сцэна для яе – гэта не проста работа, а магчымасць дарыць людзям радасць праз слова і песню.


































