
«Коласаўцы». Спектаклю «Несцерка» – 85 год
- Details
- Створана 21.05.2026 11:42
Да 100-годдзя Нацыянальнага акадэмічнага драматычнага тэатра імя Якуба Коласа ў Віцебскай абласной бібліятэцы ў рамках праекта «Коласаўцы» на працягу года ладзяцца творчыя сустрэчы з артыстамі тэатра, мерапрыемствы, прысвечаныя легендам коласаўскай сцэны.
85-годдзю легендарнага спектакля «Несцерка» па п'есе Віталя Вольскага была прысвечана сустрэча 19 мая. Прэм'ера спектакля адбылася 18 мая 1941 года. І па сённяшні час «Несцерка» па-ранейшаму збірае аншлагі ў тэатры. Вядучыя сустрэчы – літаратурны рэдактар тэатра Юрый Іваноўскі і артыстка Надзея Радзімава расказалі пра стварэнне спектакля, пра выканаўцаў вядучых роляў, лёс спектакля на працягу дзесяцігоддзяў. На кадрах відэазапісаў, фотаздымках з тэатральнага архіва прысутныя пабачылі артыстаў, чые імёны ўпісаны ў гісторыю тэатральнага мастацтва Беларусі: Цімоха Сяргейчыка, Яніну Глебаўскую, Фёдара Шмакава, Зінаіду Канапелька, Людмілу Заграбельную, Мікалая Цішачкіна, Тадэвуша Кокштыса...
Заслужаны артыст Рэспублікі Беларусь Пётр Ламан расказаў пра ролі, якія ён сыграў у спектаклі ў розныя гады: спачатку Юрася, потым Мацея, аднойчы Пётр Аляксандравіч нават выконваў ролю Шкаляра, і ўжо шмат год ён – Несцерка. Артыстка, вядучы майстар сцэны Раіса Грыбовіч, якая зараз выконвае ў спектаклі ролю Мальвіны, маці Насты, прысвяціла сваё выступленне народнай артыстцы БССР Зінаідзе Канапелька. Заслужаны артыст Рэспублікі Беларусь Вячаслаў Грушоў і мастацкі кіраўнік тэатра Канстанцін Ганчароў адзначылі, што «Несцерка» як сувязь паміж пакаленнямі, у свой час праз гэты спектакль прайшлі ўсе артысты тэатра.
Пра стварэнне ўнікальных касцюмаў да адноўленага ў 2006 годзе спектакля, якое здзейснілі мастакі па касцюмах Ніна Бабровіч і Пятро Анашчанка, расказаў мастак аднаўлення Пятро Анашчанка. Рэжысёр аднаўлення, заслужаны дзеяч мастацтваў Рэспублікі Беларусь Віталь Баркоўскі падкрэсліў, што спектакль «Несцерка» – сапраўдны скарб сусветнага ўзроўню, ён дапамагае зразумець хто мы і адкуль. Высокі гонар і абавязак тэатра – працягваць яго гісторыю, зберагчы яго для будучых гледачоў.


































