
«Краязнаўчыя сустрэчы»: 40 гадоў музею «Гісторыя Заронаўскага краю»
- Details
- Створана 19.06.2026 13:15
Сустрэча з краязнаўцамі Людмілай і Станіславам Нікіцінымі, прысвечаная 40-годдзю стварэння народнага комплекснага музея «Гісторыя Заронаўскага краю», адбылася 17 чэрвеня ў бібліятэцы ў рамках праекта «Краязнаўчыя сустрэчы».
Народны музей «Гісторыя Заронаўскага краю» быў адкрыты 9 мая 1986 года. Пачаўся ён з кутка баявой славы ў Заронаўскай школе, у якім захоўваліся каскі, фотаздымкі, лісты з фронту. У 1996 г. музею было прысвоена ганаровае званне «народны». Усе гэтыя гады музейныя калекцыі рупліва папаўняе разам са сваімі памочнікамі стваральнік музея, краязнаўца, а ў мінулым настаўнік беларускай мовы і літаратуры Людміла Нікіціна. Сёння побач з ёй працуе сын Станіслаў Нікіцін, гісторык па адукацыі. За чатыры дзесяцігоддзі музей вырас, цяпер у ім восем залаў, больш за дваццаць тысяч экспанатаў.
Людміла Канстанцінаўна і Станіслаў Пятровіч завіталі на сустрэчу разам са сваімі выхаванцамі – юнымі экскурсаводамі музея, прывезлі з сабой «музей у чамадане» з цікавымі экспанатамі. Людміла Нікіціна ўзгадала людзей, разам з якімі стварала музей, маленькіх экскурсаводаў розных гадоў, некаторыя з якіх таксама прыйшлі на сустрэчу. Акрамя штодзённай працы з дзецьмі, вялікай пошукавай работы, мноства экскурсій, Людміла і Станіслаў Нікіціны прымаюць удзел у шматлікіх раённых, абласных, рэспубліканскіх праектах і святах.
Станіслаў Нікіцін разам з юнымі экскурсаводамі з гуртка «Краязнаўцы» расказалі пра сваю дзейнасць, напрамкі работы, вынікі даследаванняў. Заронаўцам было чым здзівіць гасцей: і цікавым расповедам пра мінуўшчыну, і прадметамі побыту нашых продкаў, і ігрой на музычных інструментах, і смачнейшым пірагом, і цудоўнымі песнямі на вершы нашай зямлячкі Любові Нікіфаравай у выкананні загадчыцы Заронаўскага СДК Людмілы Аляксеевай.
З 40-годдзем музея Людмілу і Станіслава Нікіціных павіншавалі старшыня Віцебскага абласнога аддзялення ГА «Беларускі фонд міру» Таццяна Туманава, намеснік старшыні Віцебскай абласной арганізацыі грамадскага аб'яднання ветэранаў Міхаіл Ляшчынскі, старшыня Віцебскай абласной арганізацыі ГА «Ветэраны паветрана-дэсантных войск і сіл спецыяльных аперацый» Вячаслаў Белавус і намеснік старшыні арганізацыі, загадчык Музея гісторыі прыватнага калекцыяніравання Надзея Варламава, рэжысёр Святлана Пацянкова, прадстаўнікі грамадскага аб'яднання «Залаты ўзрост», навучэнцы Віцебскага дзяржаўнага тэхнічнага каледжа.


































