
Урачыстае адкрыццё выставы «Бібліятэчны атлас»
- Details
- Створана 17.07.2026 12:16
У рамках XXXV Міжнароднага фестывалю мастацтваў «Славянскі базар у Віцебску» 16 ліпеня ў бібліятэцы адбылося ўрачыстае адкрыццё выставы «Бібліятэчны атлас», прысвечанай 20-годдзю будынка Нацыянальнай бібліятэкі Беларусі.
Экспазіцыя знаёміць наведвальнікаў з бібліятэкай як з асаблівым светам, які ўражвае сваёй значнасцю, непаўторнасцю, шырынёй ахопу і разнастайнасцю напрамкаў.
У мерапрыемстве прынялі ўдзел генеральны дырэктар Нацыянальнай бібліятэкі Беларусі Вадзім Гігін, дырэктар Віцебскай абласной бібліятэкі Таццяна Адамян і каардынатар выставачнай праграмы «Міжнароднага фестывалю мастацтваў Славянскі базар у Віцебску» Алена Сярова.
Экскурсію па выставе для ўдзельнікаў адкрыцця правяла загадчык сектара мастацкіх выстаў Нацыянальнай бібліятэкі Беларусі Вікторыя Харытонава.
На старонках атласа (30 фотапланшэтаў) прадстаўлены здымкі-карты бібліятэчнай планеты, з акцэнтам на такія напрамкі яе дзейнасці, як работа з чытачамі, экскурсіі, захоўванне калекцыі, рэстаўрацыя, галерэйная і выставачная дзейнасць і інш.
Аўтарскія манахромныя здымкі Валерыя Неўмяржыцкага ахопліваюць увесь спектр бібліятэчнага жыцця – ад цішыні сховішчаў да масавых падзей. Фатограф наўмысна выводзіць на першы план архітэктурныя рашэнні, унутраную структуру прасторы, яе рытміку, пластыку формаў, графіку ліній і гульню святла з ценем.
Візуальны рад дапоўнены тэматычнымі аб'ектамі: у галерэі 1-га паверха прадстаўлены дэкаратыўныя макеты сучаснага будынка Нацыянальнай бібліятэкі, створаныя школьнікамі, студэнтамі профільных мастацкіх устаноў, іх выкладчыкамі, а таксама бібліятэкарамі і іншымі ўдзельнікамі.
Галоўны і самы значны экспанат выставы – сімвалічны ключ ад «алмаза ведаў». Менавіта яго 16 чэрвеня 2006 года ў дзень адкрыцця новага бібліятэчнага комплексу ўручыў Прэзідэнт Рэспублікі Беларусь Аляксандр Лукашэнка.
Выстава фіксуе паўсядзённае жыццё Нацыянальнай бібліятэкі, паказвае яе ў беспе-рапынным развіцці, падкрэслівае каштоўнасць яе збораў, непарыўную сувязь з чытачамі, шматузроўневасць унутраных працэсаў і тую выключную ролю, якую яна адыгрывае ў справе захавання культурнай і гістарычнай спадчыны краіны.
Азнаёміцца з экспазіцыяй «Бібліятэчны атлас» можна ў галерэі 1-га паверха Віцебскай абласной бібліятэкі з 16 па 31 ліпеня.


































