
Віцебская абласная бібліятэка – на рэспубліканскай прэс-канферэнцыі да Дня бібліятэк
- Details
- Створана 15.09.2026 12:00
Напярэдадні прафесійнага свята ў Нацыянальнай бібліятэцы Беларусі адбылася выязная прэс-канферэнцыя «Пра развіццё бібліятэчнай справы ў Беларусі». Віцебскую вобласць на ёй прадставіла загадчык аддзела бібліятэказнаўства Віцебскай абласной бібліятэкі імя У. І. Леніна Надзея Мелькіна.
Яна падзялілася з журналістамі і калегамі тым, як жыве бібліятэчная сетка Прыдзвіння. Сёння гэта 360 бібліятэк з сукупным фондам у 5,9 мільёна экзэмпляраў. Калі выкласці гэтыя кнігі ў адзін рад, іх агульная працягласць перавысіла б тысячу кіламетраў – больш, чым Заходняя Дзвіна ад вытоку да вусця. Паслугамі бібліятэк карыстаюцца каля 370 тысяч чалавек, а значыць, кожны трэці жыхар вобласці – чытач гэтых устаноў. Толькі за мінулы год тут прайшло больш за 26 тысяч мерапрыемстваў, і тры чвэрці з іх былі разлічаны на дзяцей і падлеткаў.
Да Дня бібліятэк Віцебшчына падрыхтавала насычаную праграму. Святочныя мерапрыемствы пройдуць ва ўсіх бібліятэках вобласці. Для дзвюх раённых бібліятэк прафесійнае свята стане асабліва ўрачыстым: свой 100-гадовы юбілей адначасова адзначаюць Ушацкая раённая бібліятэка імя Е. Я. Лось і Расонская раённая бібліятэка.
Бібліятэчная супольнасць Беларусі заўсёды адкрыта да супрацоўніцтва. Бо за кожнай лічбай, за кожным мерапрыемствам – жывыя людзі, цёплыя сустрэчы і новыя адкрыцці, якімі хочацца дзяліцца.
Фотаздымкі прадастаўлены Нацыянальным прэс-цэнтрам Рэспублікі Беларусь.


































