
Юбілейная выстава фларыстыкі Р.Г. Спачыньскай «Моманты ісціны»
- Details
- Створана 19.05.2011 08:59
18 мая ў фае бібліятэкі адкрылася юбілейная выстава фларыстыкі Раісы Герасімаўны Спачыньска "Моманты ісціны".
18 мая ў фае бібліятэкі адкрылася юбілейная выстава фларыстыкі Раісы Герасімаўны Спачыньска "Моманты ісціны". Раіса Герасімаўна ў 1953 годзе скончыла фізіка-матэматычны факультэт Віцебскага педагагічнага інстытута. Працавала педагогам у школе, метадыстам Віцебскага інстытута ўдасканальвання настаўнікаў. У 1956 годзе была абрана сакратаром Акцябрскага райкама камсамола. А пачынаючы з 1965 года больш за 20 гадоў адпрацавала ў абласной бібліятэцы. На заслужаным адпачынку Раіса Герасімаўна захапілася фларыстыкай, адкрыла ў сабе талент мастака. У 2001 годзе адбылася яе першая персанальная выстава. З таго часу, на працягу 10 гадоў, Раіса Герасімаўна прысвяціла сябе гэтаму цудоўнаму мастацтву. Развіццю яе творчых здольнасцей садзейнічалі заняткі ў клубе "Анюта" – народным аматарскім калектыве. Як адзначыла на адкрыцці выставы яго кіраўнік Іна Іванаўна Юрчанка, творчасць Раісы Герасімаўны выклікае захапленне, яе аб'ёмныя карціны дапамагаюць убачыць цудоўнае ў звычайных прадметах, развіваюць фантазію.
На выставе прадстаўлена 15 работ, створаных на працягу апошняга года. Гэта непаўторныя кампазіцыі, якія могуць упрыгожыць любы інтэр'ер. Работы Р. Спачыньска пакараюць тонкасцю, вытанчанасцю, нечаканымі мастацкімі знаходкамі. Яны гучаць як музыка. Таму так гарманічна прагучалі на адкрыцці выставы музычныя творы ў выкананні Алены Марчанкі і яе вучняў, вершы паэтэсы Наталлі Салаўёвай, а таксама танцавальнае віншаванне заслужанага аматарскага калектыву Рэспублікі Беларусь ансамбля класічнага танца "Піруэт".


































