
Літаратурная вечарына "Часоў жывая плынь"
- Details
- Створана 01.12.2010 11:49
30 лістапада 2010 года ў Віцебскай абласной бібліятэцы імя У.І. Леніна адбылася літаратурная вечарына “Часоў жывая плынь”, прысвечаная 80-годдзю з дня нараджэння славутага і непаўторнага пісьменніка, імя якога залатымі літарамі ўпісана ў Вечную Кнігу Літаратуры – Уладзіміра Сямёнавіча Караткевіча.
У мерапрыемстве прынялі ўдзел лаўрэаты абласной літаратурнай прэміі імя У.С. Караткевіча. Давід Сімановіч, гартаючы старонкі сваёй апошняй кнігі “Дневник осенних вечеров”, перанёс прысутных у далёкі 1958 год, калі лёс звёў яго на настаўніцкай нарадзе ў Віцебску з Уладзімірам Сямёнавічам. Акрамя таго, віцебскі паэт прапанаваў увазе гледачоў невядомыя нікому фотаздымкі з постаццю Караткевіча. Загадчыца кафедры беларускай літаратуры ВДУ імя П.М. Машэрава, кіраўнік студэнцкага літаратурнага гуртка “Зараначка”, паэтэса Вольга Русілка прыйшла на вечарыну з пераможцай літаратурнага конкурсу “На канікулы з Караткевічам” магістранткай Таццянай Дубоўскай, якая пазнаёміла ўсіх са сваімі паэтычнымі знаходкамі. Доктар гістарычных навук, кандыдат філасофскіх навук, прафесар, член Саюза пісьменнікаў Беларусі, аўтар манаграфіі “Уладзімір Караткевіч : праз гісторыю ў сучаснасць” Аркадзь Русецкі выступіў з паведамленнем “Уладзімір Караткевіч і сучасная беларуская мастацкая культура”.
Загадчыца літаратурнай часткай Нацыянальнага акадэмічнага драматычнага тэатра імя Я. Коласа Святлана Дашкевіч распавяла пра супрацоўніцтва беларускага пісьменніка-драматурга з калектывам тэатра, якое распачалося ў 1974 годзе. У той час на коласаўскай сцэне ажыццявіліся пастаноўкі п’ес Караткевіча “Званы Віцебска” і “Кастусь Каліноўскі”. Артыстка тэатра Зінаіда Гурбо прадставіла на суд слухачоў маналог Беларусі са спектакля “Кастусь Каліноўскі” і прачытала вершы са спадчыны пісьменніка.
Старшы навуковы супрацоўнік аршанскага музея У. Караткевіча Вольга Пашковіч, якая, дарэчы, зусім нядаўна атрымала званне лаўрэата абласной літаратурнай прэміі імя У. Караткевіча, пазнаёміла прысутных з дзейнасцю ўстановы і прэзентавала ўрыўкі з фільма “Водны шлях ад Оршы да Рагачова”, падкрэсліўшы, што менавіта гэтым маршрутам любіў вандраваць па Дняпры Уладзімір Сямёнавіч.
Намаганнямі супрацоўнікаў аддзела беларускай літаратуры Віцебскай абласной бібліятэкі імя У. І. Леніна падрыхтаваны і выдадзены анатаваны біябібліяграфічны паказальнік “Уладзімір Караткевіч у творах мастацтва”, прэзентацыя якога была зроблена падчас імпрэзы і прымеркавана да юбілею геніяльнага земляка.
Загадчыца абласнога Літаратурнага музея Святлана Казлова прапанавала акунуцца ў экспазіцыю “Старыя беларускія хронікі”, прысвечаную драматургічнай спадчыне пісьменніка.
Ажывілі ход мерапрыемства выступленне народнага ансамбля “Ліра”, які выканаў песню “На Беларусі Бог жыве” (сл. У. Караткевіча, муз. Н. Несцярэнкі) і інсцэніроўка паводле апавядання У. Караткевіча “Паляшук” у выкананні старшакласнікаў - удзельнікаў драматычнага гуртка віцебскай гімназіі № 2 (кіраўнік – настаўніца беларускай мовы і літаратуры Э. І. Петрачэнка).



































