
Прэзентацыя кнігі У. І. Джарыяні «Наш выбор»
- Details
- Створана 07.02.2013 09:02
4 лютага ў аддзеле літаратуры па мастацтве адбылася прэзентацыя кнігі старшыні мастацка-эстэтычнага салона «Оли-art» Уладзіміра Іванавіча Джарыяні «Наш выбор: из истории тбилисского клуба "Ракурс"».
Уладзімір Іванавіч – творчы чалавек. Разам з іншымі ўдзельнікамі салона «Оли-art», які дзейнічае пры аддзеле літаратуры па мастацтве абласной бібліятэкі, на працягу 12 гадоў падрыхтаваў і ажыццявіў для віцяблян дзясяткі праектаў.
Гутарка на сустрэчы ішла аб іншым перыядзе жыцця У. І. Джарыяні – тбіліскім. Працуючы ў навукова-даследчым інстытуце, Уладзімір Іванавіч, акрамя прафесійнай, займаўся культурна-асветніцкай дзейнасцю. З 1981 па 1990 гг. кіраваў паэтычным клубам «Ракурс». Членамі клуба створаны праграмы пра У. Высоцкага, Б. Акуджаву, з якімі ён неаднаразова сустракаўся. Адзін з самых вядомых праектаў клуба – «Каждый выбирает для себя» (г. Тбілісі, 1987 г.), прэм'ера якога адбылася ў кастрычніку 1988 г. у Доме культуры аб'яднанага інстытута ядзерных даследаванняў г. Дубна Маскоўскай вобласці. Прысвечана праграма жыццю і творчасці І. Бродскага, У. Высоцкага, А. Галіча. Гэтыя праекты былі неаднаразова прадстаўлены ў Маскве, Ерэване, Ленінградзе, Тбілісі і многіх іншых гарадах. Расказ Уладзіміра Іванавіча суправаджаўся паказам фрагментаў з яго інтэрв'ю студыі віцебскага тэлебачання, з публіцыстычнага калажа «Каждый выбирает для себя», фатаграфій з асабістага архіва. Гучалі музычныя запісы песень у выкананні Т. Гвердцытэлі, Н. Брэгвадзэ, В. Кікабідзэ, В. Меладзэ.


































