Калектыў тэатральны «Трыяда». Лепельскі раён, г. Лепель

Подробности

Створана 14.05.2019 12:23

Адноўлена 14.05.2019 09:33

Тэатральны калектыў «Трыяда» Лепельскага Цэнтра дзіцячай творчасці быў заснаваны ў верасні 1990 года.

Ствараўся ён на базе першага беларускамоўнага класа сярэдняй школы № 3 горада Лепеля. Зараз тэатр-студыя займае невялікі пакой і глядзельную залу на 90 пасадачных месцаў у старым будынку выканкама.

Яе стваральнікам і кіраўніком з'яўляецца Вольга Мікалаеўна Міханенка.

Назву тэатральнай студыі прыдумалі самі выхаванцы. З грэчаскай мовы слова «трыяда» перакладаецца як адзінства трох пачаткаў. Таму яны назвалі свой калектыў «Трыяда» як сімвалічны саюз Веры, Надзеі і Любові.

Дэвізам студыі сталі словы К. С. Станіслаўскага: «Цяжкае павінна стаць звыклым, звыклае – лёгкім, а лёгкае – прыгожым».

Галоўная мэта работы – адаптацыя дзяцей і падлеткаў да сучаснай рэчаіснасці, развіццё іх светапогляду, мастацкага густу, ператварэнне норм агульначалавечай маралі ў асабістыя перакананні і правілы штодзённых паводзін.

Напрамкі навучання: акцёрскае майстэрства, сцэнічны рух і пластыка, музычнае афармленне спектакля, асновы грыму.

У 1994 годзе студыі было прысвоена званне – «узорны аматарскі тэатр».

У рэпертуары спектаклі: «Воран» Карла Гоцы, «Паўлінка» Янкі Купалы, «Дзяўчынка і красавік» Т. Яна, «Дай вады, калодзеж» П. Макаля, па беларускіх народных казках «Дзед і жораў», «Лісіца-хітрыца»; «Зайка-зазнайка» С. Міхалкова, «Прыгоды Мішкі Таптышкі і яго сяброў» М. Скрыпкі, па казцы ў вершах «Адчыніце, казляткі» П. Макаля, па п'есе «Калі мухі кашляюць» У. Міхно.

Калектыў з'яўляецца ўдзельнікам і дыпламантам абласных і рэспубліканскіх фестываляў, конкурсаў тэатральнага мастацтва.

У 1997 годзе калектыў удзельнічаў у міжнародным фестывалі «Мастацтва Атлантыды» (Берлін).

У 1998 годзе студыя «Трыяда» пацвердзіла сваё званне – «узорны калектыў».

Студыя супрацоўнічае з узорным дзіцяча-юнацкім тэатрам «Мара» выдатнага аб'яднання пазашкольнай работы.

ЛІТАРАТУРА

1. Барадзейка, Л. «Крок у неба» / Л. Барадзейка // Лепельскі край. – 2002. – 19 крас. – С. 2.

2. Побединская, Л. В. К вершине творчества / Л. В. Побединская // Пазашкольнае выхаванне. – 2000. – № 1. – С. 43–45.