Калектыў народны фальклорны «Купалінка». Шаркаўшчынскі раён, в. Каўшэлева

Подробности

Створана 12.11.2018 12:23

Адноўлена 12.03.2020 10:48

Народны фальклорны калектыў «Купалінка» створаны пры Каўшэлеўскім сельскім Доме культуры. Аб'ядноўвае каля 20 чалавек. Удзельнікі народнага калектыву займаюцца канцэртнай дзейнасцю, а таксама распрацоўкай і пастаноўкай народных свят і абрадаў. У рэпертуары «Купалінкі» ёсць пэўны запас калядных і шчадроўных песень, якія калектыў выкарыстоўвае пры правядзенні народных абрадаў. Многа песень у «Купалінкі» на жніўную тэму. Песенны матэрыял сабраны ад мясцовых жыхароў. «Купалінка» выкарыстоўвае фальклорную спадчыну для правядзення абрадаў «Дажынкі» і «Зажынкі». Ёсць у рэпертуары мясцовыя прыпеўкі.

Удзельнікамі «Купалінкі» нямала зроблена для вывучэння старажытных карагодаў і крутух. Вывучаны такія крутухі, як «Заінька шэры», «Ой, на гары каліна» і іншыя, карагоды «Каценька», «Кавалёчак», «На гары Ваня стаіць». На аснове вывучаных карагодаў фальклорны калектыў паставіў на сцэне свайго клуба, а таксама на раённай сцэне свята Карагода. Самадзейнымі артыстамі вывучаны народны абрад «Багач» – свята збору ўраджаю і пачатку сяўбы азімых.

Назву калектыў «Купалінка» атрымаў ад свята Купалле. Менавіта ў ліпені ўтварыўся калектыў. Ніводнае свята Купалле не абыходзіцца без удзелу артыстаў. У рэпертуары музычнага калектыву шмат купальскіх песень.

Спецыяльна для канцэртаў распрацавана некалькі танцавальна-песенных кампазіцый з выкарыстаннем найбольш яркіх і запамінальных народных танцаў і народных песень. Гэта кампазіцыі «Запрашае матчына песня», «А не ўсё па гору плакаць», «Ой, зайграйце, музыкі!».

У сваёй дзейнасці калектыў «Купалінка» кіруецца адной мэтай – збор і развіццё мясцовага песеннага і танцавальнага фальклору.

ЛІТАРАТУРА

1. Вайцюль, Н. І. Калектыў «Купалінка» пры Каўшэлеўскім сельскім Доме культуры / Н. І. Вайцюль // Памяць: Шаркаўшчынскі раён : гісторыка-дакументальныя хронікі гарадоў і раёнаў Беларусі / рэдкал.: Л. М. Драбовіч [і інш.] ; уклад. Л. М. Лабачэўская ; мастак Э. Э. Жакевіч. – Мінск : Белта, 2004. – С. 449–450.

2. Прадстаўляем: «Купалінка»: фальклорны калектыў Каўшэлеўскага СДК // Кліч Радзімы (Шаркаўшчына). – 2002. – 12 кастр. – С. 2.