Клуб народны творчых сустрэч «Муза». Ушацкі раён, г. п. Ушачы

Подробности

Створана 12.05.2020 12:23

Адноўлена 12.05.2020 11:03

Народны клуб творчых сустрэч «Муза» створаны ў 1993 годзе пры Ушацкім раённым Цэнтры культуры і народнай творчасці. Накірунак дзейнасці клуба – літаратурна-мастацкі. Мэты і задачы клуба – выяўленне і падтрымка самадзейных паэтаў, пісьменнікаў і кампазітараў Ушаччыны, папулярызацыя іх творчасці, актыўныя творчыя зносіны і ўзаемаўзбагачэнне яго ўдзельнікаў, прапаганда здабыткаў у літаратурнай, кампазітарскай дзейнасці, арганізацыя змястоўнага адпачынку.

У клубе 26 удзельнікаў. Гэта творчыя людзі розных узростаў і прафесій (педагогі, урачы, работнікі культуры), якія пражываюць у раёне. Аснову работы аматарскага аб'яднання складаюць клубныя сустрэчы і пасяджэнні. Удзельнікі клуба таксама праводзяць літаратурныя вечарыны, літаратурна-музычныя кампазіцыі, прэзентацыі кніг, конкурсы, сустрэчы са знакамітымі паэтамі-землякамі, вечары адпачынку. Пашырэнню кругагляду ўдзельнікаў клуба садзейнічаюць мерапрыемствы, прысвечаныя творчасці знакамітых пісьменнікаў і паэтаў Беларусі.

У рабоце клуба ў 2019 годзе выкарыстоўваліся такія формы работы, як выстава-дэгустацыя «Дары сада і агарода», вечары калектыўнага адпачынку «Калядныя пасядзелкі», «Купалле сплятае вянкі», творчы салон «Крыніца натхнення – свет вакол нас», прэзентацыі-агляды літаратурных часопісаў «Юбілейныя даты пісьменнікаў і дзеячаў мастацтваў».

У 2019 годзе члены клуба «Муза» прадставілі свае творы на конкурсе самадзейных кампазітараў і паэтаў Ушаччыны «І льецца песня над маёй Ушаччынай» і былі адзначаны дыпломамі пераможцаў. Сярод дыпламантаў: самадзейныя кампазітары Сяргей Мядзведзеў, Таццяна Сандзюк; паэты Сняжана Мялешка, Ірына Навагродская, Людміла Цяцерка, Галіна Данілёнак, Валянціна Літвін.

Удзельнікі клуба былі адзначаны дыпломамі на абласным свяце-конкурсе самадзейных паэтаў і кампазітараў «Песні сунічных бароў» (2019), якое праходзіла ў Лёзна: самадзейная паэтэса Ірына Навагродская ў намінацыі «Лепшы твор, прысвечаны Году малой радзімы» і паэтэса Тамара Барадзёнак у намінацыі «Лепшы песенны тэкст», а сам клуб атрымалі дыплом лаўрэата I ступені агляду-конкурсу літаратурных пляцовак.

У 2019 годзе падрыхтавана і выдадзена брашура «Калі паэзія натхняе», куды ўвайшлі вершы сучасных самадзейных аўтараў Ушаччыны. Папулярызацыі дзейнасці клуба «Муза» спрыяе раённая газета «Патрыёт», дзе друкуюцца творы ўдзельнікаў. Пры клубе створаны калектыў-спадарожнік юных удзельнікаў клуба «Мара».

Народны клуб падтрымлівае цесную сувязь з установамі культуры, адукацыі, грамадскімі аб'яднаннямі праз удзел у такіх мерапрыемствах, як раённы конкурс «Мнагадзетная сям'я года», тэматычная сустрэча, прысвечаная Дню памяці воінаў-інтэрнацыяналістаў і 30-годдзю вываду савецкіх войск з Афганістана «Пакуль мы памятаем – мы жывем», святочны тэматычны канцэрт да Дня міліцыі «На варце спакою» і іншыя.

Кіраўніком клуба была Варатынская Галіна Аляксандраўна, а з сакавіка 2019 года кіраўніком стала Каваленка Наталля Міхайлаўна, рэжысёрам – Смыслова Людміла Васільеўна.

ЛІТАРАТУРА

1. Варатынская, Г. Выток нашага пазнання / Г. Варатынская // Патрыёт (Ушачы). – 2017. – 23 жн. – С. 3.

2. Варатынская, Г. Творчасць ад родных ніў / Г. Варатынская // Патрыёт (Ушачы). – 2019. – 13 лют. – С. 1, 4.

3. Варатынская, Г. «Усе мы родам з дзяцінства» / Г. Варатынская // Патрыёт (Ушачы). – 2017. – 26 ліп. – С. 3.

4. Лукович, Н. Сила притяжения – поэзия / Н. Лукович // Народнае слова. – 2008. – 27 сак. – С. 9.

5. Неруш : [літаратурная старонка] // Патрыёт (Ушачы). – 2017. – 14 чэрв. – С. 3.

6. Чакушка, В. Калі паэзія натхняе / В. Чакушка // Витебские вести. – 2019. – 31 янв. – С. 23.

7. Шпакоўская, Г. «Муза» натхняе і дорыць сяброўства / Г. Шпакоўская // Витебские вести. – 2016. – 1 марта. – С. 6.