Клуб народны нацыянальнай кухні «Прысмакі». Ушацкі раён, г. п. Ушачы

Подробности

Створана 12.05.2020 12:23

Адноўлена 12.05.2020 11:07

Клуб нацыянальнай кухні «Прысмакі» створаны пры Ушацкім раённым Цэнтры культуры і народнай творчасці ў 1995 годзе. У 2004 годзе атрымаў званне «народны». Дзейнасць калектыву народнага клуба нацыянальнай кухні «Прысмакі» накіравана на захаванне і адраджэнне культурных традыцый жыхароў нашага раёна, перадачу маладому пакаленню нематэрыяльнай спадчыны і традыцый нашых продкаў (розныя стравы беларускай кухні, прыказкі, прымаўкі пра беларускую кухню, рэцэпты абрадавых страў і інш.).

У клубе 15 удзельнікаў. Гэта творчыя людзі розных узростаў і прафесій, якія пражываюць у раёне. Народны клуб карыстаецца вялікай папулярнасцю. Удзельнікі клуба на аснове старадаўніх гульняў, абрадаў, звычаяў ствараюць забаўляльныя праграмы, тэатралізаваныя паказы. У рэпертуары калектыву – абрадавыя песні і бытавыя танцы, рэцэпты рэгіянальнай кухні.

На працягу 2019 года народны клуб нацыянальнай кухні «Прысмакі» прымаў удзел у розных мерапрыемствах: у традыцыйнай народнай гульні «Жаніцьба Цярэшкі», абрадзе «Валачобнікі», свяце народнага календара «Купалле», «Юр'е», «Мядовы Спас» і «Яблычны Спас». Калектыў з'яўляецца актыўным удзельнікам раённых, абласных, рэгіянальных, міжнародных свят, аглядаў, конкурсаў. Прымае ўдзел у міжнародных фестывалях песні і музыкі «Дняпроўскія галасы ў Дуброўне», «Звіняць цымбалы і гармонік» у Паставах, «Славянскі базар у Віцебску». Клуб «Прысмакі» з'яўляецца непасрэдным удзельнікам раённых свят і кірмашоў, мерапрыемстваў, якія праводзяцца ў клубных установах раёна.

Так, клуб прымаў удзел у масавых раённых мерапрыемствах: святах, прысвечаных 74-годдзю са Дня Перамогі, 75-годдзю вызвалення Рэспублікі Беларусь ад нямецка-фашысцкіх захопнікаў і Дню Незалежнасці Рэспублікі Беларусь, літаратурным тыдні, прысвечаным 95-годдзю з Дня нараджэння народнага пісьменніка Беларусі Васіля Быкава; падчас мерапрыемстваў клуб прэзентаваў беларускія нацыянальныя стравы, выступаў з канцэртнымі нумарамі.

Народны клуб нацыянальнай кухні «Прысмакі» прымаў удзел у прадстаўленні брэнда «Беларускі край свой праслаўляем – спадчыну нашых дзядоў зберагаем» у рамках ХХVIII Міжнароднага фестывалю мастацтваў «Славянскі базар у Віцебску».

У 2019 годзе ўдзельнікі клуба «Прысмакі» правялі чатыры творчыя экспедыцыі па збору фальклорнага матэрыялу ў вёсках Весніцк і Садкі.

Членамі клуба распрацаваны буклеты «Ушацкія прысмакі», «Наша страва ўсім стравам – беларускі сувенір».

З 2012 года на раённай радыёперадачы «Інфармацыйны веснік» вядзецца спецыяльная рубрыка «Ушацкія прысмакі», дзе жыхары раёна знаёмяцца з рэцэптамі старадаўніх страў Ушаччыны.

На працягу многіх гадоў кіраўніком клуба «Прысмакі» была М. В. Сазонава. З лістапада 2019 года кіраўніком народнага клуба нацыянальнай кухні «Прысмакі» з'яўляецца Уладзімір Уладзіміравіч Верташонак.

ЛІТАРАТУРА

1. Стравы матчыны з Вушаччыны / падрыхт. Г. Шпакоўская // Витебские вести. – 2018. – 23 июня. – С. 8–9.

2. Тарасеня, С. Хваля добрых пачуццяў / С. Тарасеня // Патрыёт (Ушачы). – 2006. – 22 лют. – С. 4.