Калектыў народны фальклорны «Гульбічы». Шумілінскі раён, г. п. Шуміліна

Подробности

Створана 30.06.2020 12:23

Адноўлена 23.06.2020 11:09

Народны фальклорны калектыў «Гульбічы» Шумілінскага раённага Цэнтра культуры створаны ў 1988 годзе.

У 1994 годзе калектыву прысвоена ганаровае званне «народны».

У складзе калектыву – работнікі адукацыі і культуры – аўтэнтычныя носьбіты, якія пераймаюць выканаўчае майстэрства Шумілінскага раёна.

Інструментарый складаюць баян, гармонік, скрыпка, цымбалы, трашчоткі, барабан, бубен.

У рэпертуары – абрадавы і пазаабрадавы фальклор у аўтарскай стылізацыі вусна-паэтычнага і музычнага тэкстаў. У праграме выкарыстоўваюцца ўзоры песеннай традыцыі ў выкананні аўтэнтычных носьбітаў. Для калектыўнай творчасці характэрна песенная (асабліва прыпевачная) імправізацыя.

У канцэртнай выканаўчай практыцы стылістычна адноўлены абрады і святы: «Каляды», «Юр'я», «Вялікдзень», «Талака», «Зажынкі», «Масленіца». Створаны аўтарскія сцэнічныя прадстаўленні: «Шумілінская кадрыля», «Справы сардэчныя», «Кірмашоўскія замалёўкі», «У купальскі вечарок», «Вянок беларускіх полек».

Калектыў – удзельнік і дыпламант розных мерапрыемстваў, сярод якіх: Усебеларускі фестываль народнага мастацтва «Беларусь – мая песня», Міжнародны фестываль мастацтваў «Славянскі базар у Віцебску», Міжнародны фестываль песні і музыкі «Дняпроўскія галасы ў Дуброўне», фестываль-конкурс фальклорных калектываў (Сянно, 2000), Міжнародны фестываль «Латышская Масленіца» (Даўгаўпілс, 2001), Міжнародны фестываль фальклору «Балтыка-2003» (г. Краслава, Латвія), Міжнародны фестываль-кірмаш нацыянальных культур, традыцый, рамёстваў, фальклору (г. Лодзь, Польшча, 2005) і іншыя.

Заснавальнік і нязменны кіраўнік калектыву – Цыркунова Ларыса Іванаўна.

ЛІТАРАТУРА

1. Гурчанка, А. І. Шумілінскі народны фальклорны калектыў «Гульбічы» / А. І. Гурчанка // Беларускі фальклор : энцыклапедыя : у 2 т. / рэдкал.: Г. П. Пашкоў [і інш.]. – Мінск : БелЭн, 2006. – Т. 2 : Л–Я. – С. 769.

2. Кернажыцкая, Л. Вопыт і праблемы захавання аўтэнтычнага фальклору ў дзейнасці фальклорных калектываў Віцебшчыны / Л. Кернажыцкая // Народная культура Віцебшчыны : матэрыялы навукова-практычнай канферэнцыі / рэдкал.: Л. Вакар [і інш.]. – Віцебск : ВДУ імя П. М. Машэрава, 2007. – С. 177–194.

3. Мароз, М. Вас вітаюць «Гульбічы»! / М. Мароз // Герой працы (Шуміліна). – 2010. – 14 верас. – С. 4.

СПАСЫЛКІ

 Песня «На полатях» записана в 2015-м году фольклорным коллективом «Гульбичи»