Браслаўскія зарніцы, Міжнароднае свята традыцыйнай культуры. Браслаў, г.

Подробности

Створана 26.01.2023 09:04

Адноўлена 26.01.2023 10:30

Міжнароднае свята традыцыйнай культуры «Браслаўскія зарніцы» вядзе сваю гісторыю з 1967 года.

Першыя афіцыйныя «Браслаўскія зарніцы» прайшлі ў 1967 годзе і былі задуманы не толькі як песенны фестываль, але і як своеасаблівае падвядзенне вынікаў работы народнагаспадарчага комплексу. Ля іх вытокаў стаялі тагачасны сакратар па ідэалогіі райкама партыі Барыс Лысы і загадчыца аддзела культуры Валянціна Вашчанка.

Прататыпам «Браслаўскіх зарніц» сталі масавыя песенныя святы, якія праводзіліся ў Прыбалтыцы.

За больш чым паўвекавы шлях яно вырасла з мясцовага мерапрыемства ў маштабны творчы праект, які ведаюць далёка за межамі Беларусі, стала своеасаблівай візітнай карткай рэгіёну. Сёння «Браслаўскія зарніцы» ўваходзяць у тройку найстарэйшых песенных праектаў нашай краіны, а на Віцебшчыне гэта ўвогуле самы багаты на ўзрост фестываль. Прыняць удзел у ім – гонар для творчых калектываў. За доўгія гады існавання ў міжнародным свяце прынялі ўдзел творчыя калектывы Беларусі, Латвіі, Літвы, Польшчы, Расіі, Арменіі, Азербайджана, Венесуэлы, Сербіі, Кітая.

Звычайна свята праводзіцца ў канцы мая або пачатку чэрвеня і ўключае ў сябе двухдзённую праграму. У яе ўваходзяць выступленні калектываў песні і танцаў розных гарадоў і краін, фестываль сярэднявечнай культуры «Меч Брачыслава», харавая асамблея, тэатралізаванае шэсце, выступленні папулярных эстрадных выканаўцаў.

Традыцыйнае месца правядзення – лесапарк «Леснічоўка» і Замкавая гара. Спецыяльна для выступлення хору ў Леснічоўцы была пабудавана эстрадная пляцоўка з прыступкамі.

На працягу ўсёй гісторыі правядзення свята яму штогод надаваліся дэвіз ці тэматыка. Так, лозунгамі былі юбілеі заснавання дзяржавы і камуністычнай партыі, гадавіны святкавання перамогі ў Вялікай Айчыннай вайне, вызваленне краю ад нямецка-фашысцкіх захопнікаў, прысвячалася свята моладзі, ахове дзяцінства і інш.

Спачатку мерапрыемства задумвалася як песенны конкурс. У 1998 годзе «Браслаўскія зарніцы» набылі статус абласнога свята, а ў 2002 яны праводзіліся пад эгідай еўрарэгіёна «Азёрны край» і сабралі творчыя калектывы з краін – удзельніц гэтай арганізацыі. У 2009 годзе свята атрымала статус міжнароднага і праводзіцца з мэтай адраджэння, развіцця і папулярызацыі лепшых традыцый і дасягненняў нацыянальнай і сусветнай культуры.

Свята «Браслаўскія зарніцы» спалучае ў сабе дух аўтэнтычнасці і сярэднявечча. Гасцям свята даецца магчымасць убачыць выступленні самадзейных калектываў Беларусі і краін блізкага замежжа, паўдзельнічаць у народных абрадах, старадаўніх забавах і майстар-класах па традыцыйных рамёствах і сярэднявечных танцах.

Арганізатары свята – Міністэрства культуры Рэспублікі Беларусь, Віцебскі абласны выканаўчы камітэт, Браслаўскі раённы выканаўчы камітэт.

Інфармацыя падрыхтавана па па матэрыялах сайта http://belsmi.by.

ЛІТАРАТУРА

1. Браслаўскія зарніцы // Фестывалі ад А да Я : фестывальны аматарскі рух Беларусі / склад.: Т. М. Яскевіч, Р. І. Вайцяхоўская. – Мінск : ІВЦ Мінфіна, 2020. – С. 46–49.

2. «Браслаўскія зарніцы–2021»: брэндавае свята вярнулася / падрыхт. Алена Набеева, Казімір Пятушка, Вольга Патаповіч // Браслаўская звязда. – 2021. – 2 чэрв. – С. 4–5.

3. Буланава, В. Меч Брачыслава: спалучэнне гісторыі і сучаснасці на Замкавай гары / В. Буланава // Браслаўская звязда. – 2017. – 31 мая. – С. 4.

4. Каладынскі, В. Свята для сапраўдных сяброў / Вячаслаў Каладынскі // Віцьбічы = Витьбичи. – 2022. – 9 июня. – С. II. – (Прил.: Вечерний Витебск).

5. Кука, Т. В. «Браслаўскія зарніцы» / Т. В. Кука // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 108.

6. Пашкевіч, Т. Песня даўжынёй у паўстагоддзя / Тамара Пашкевіч // Витебские вести. – 2022. – 7 июня. – С. 13.

7. Рагін, Я. На трох вялікіх і мудрых кітах / Яўген Рагін // Культура. – 2022. – 5 сак. – С. 11.

8. Райчонак, С. «Браслаўскім зарніцам» – 55 год! / Сяргей Райчонак // Кліч Радзімы (Шаркаўшчына). – 2022. – 15 чэрв. – С. 3.

9. Сидорович, О. И. Обереги Браславщины. Праздник открывает горизонты // Витебщина на рубеже тысячелетий / О. И. Сидорович. – Минск : БелЭн імя Петруся Броўкі, 2017. – С. 293.