Цітоў Міхаіл Севасцьянавіч
Цітоў Міхаіл Севасцьянавіч нарадзіўся 24 студзеня 1925 года ў в. Вялікае Лосвіда Гарадоцкага раёна ў сялянскай сям'і.
Пасля заканчэння Аляксандраўскай няпоўнай сярэдняй школы ён адразу пачаў працаваць у калгасе. Адначасова Міхаіл працягваў навучанне ў Гарадоцкай сярэдняй школе № 1, а з 9 класа перавёўся ў Беларускі дзяржаўны кінатэхнікум у г. Віцебск (зараз не існуе).
З пачаткам Вялікай Айчыннай вайны Міхаіл Севасцьянавіч вярнуўся на малую радзіму. Спачатку ён дапамагаў партызанам на акупаванай тэрыторыі, а ў 1942 годзе быў залічаны ў партызанскі атрад Д. Ф. Райцава. У сярэдзіне жніўня 1944 года быў залічаны ў 32-і мотастралковы полк 7-й стралковай дывізіі ў падпарадкаванне Упраўлення ўнутраных войск Міністэрства дзяржаўнай бяспекі СССР па Беларускай ваеннай акрузе. У складзе палка ён забяспечваў наступальныя дзеянні армій 1-га Беларускага фронту, удзельнічаў у аперацыях па ліквідацыі ўзброеных груповак.
За баявыя заслугі і ўзорнае выкананне службы ў партызанскім атрадзе і ўнутраных войсках Міхаіл Севасцьянавіч быў адзначаны ўрадавымі ўзнагародамі, пахвальным лістом і Ганаровай граматай Вярхоўнага Савета БССР.
У 1950 годзе Міхаіл Цітоў быў звольнены ў запас. У гэтым жа годзе ён пераехаў у г. Віцебск і на працягу 35 гадоў працаваў токарам-шліфоўшчыкам на Віцебскім станкабудаўнічым заводзе імя Камінтэрна.
За вялікі ўклад у развіццё народнай гаспадаркі рэспублікі, актыўную грамадскую дзейнасць і ў сувязі з 30-годдзем Перамогі савецкага народа ў Вялікай Айчыннай вайне Цітову Міхаілу Севасцьянавічу было прысвоена ганаровае званне «Заслужаны работнік прамысловасці Беларускай ССР».
Указам Прэзідыума Вярхоўнага Савета СССР ад 3 сакавіка 1976 года за вялікі ўклад у павышэнне эфектыўнасці вытворчасці і якасці выпускаемай прадукцыі, выдатныя працоўныя поспехі, дасягнутыя ў выкананні заданняў 9-га пяцігадовага плана і сацыялістычных абавязкаў, Цітову Міхаілу Севасцьянавічу было прысвоена званне «Герой Сацыялістычнай Працы».
М. С. Цітоў неаднаразова абіраўся дэпутатам Вярхоўнага Савета СССР (1974–1979), Віцебскага абласнога, гарадскога і Чыгуначнага раённага Саветаў дэпутатаў працоўных. Дэлегат XIV з'езда прафсаюзаў БССР (1977), XXVI з'езда КПСС (1981). Таксама абіраўся членам бюро КП(б) і партыйнага камітэта завода імя Камінтэрна.
Узнагароджаны ордэнамі Чырвонай Зоркі, Айчыннай вайны I, II ступеняў, Леніна (двойчы), медалямі.
Жыў у Віцебску.
Памёр Міхаіл Севасцьянавіч 3 сакавіка 2008 года.
У 2014 годзе ў Віцебску была ўсталявана мемарыяльная дошка М. С. Цітову.
ЛІТАРАТУРА
1. Аляксандраў, Т. Аўдыторыя – мільёны / Т. Аляксандраў // Віцебскі рабочы. – 1979. – 17 студз. – С. 2.
2. Васіленка, А. Новыя вышыні / А. Васіленка // Звязда. – 1980. – 24 студз. – С. 2.
3. Титов, М. С. Рабочий – звучит гордо / М. С. Титов ; беседовал Л. Винокуров // Знамя юности. – 1984. – 25 апр. – С. 2.
4. Титов Михаил Севастьянович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн, 2011. – Т. 2 : Витебская область : в 2 кн. – Кн. 2. – С. 509–510.
5. Титов Михаил Севастьянович // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 311.
6. Титов Михаил Севастьянович // Твои герои, Беларусь! Герои Социалистического Труда : биографический справочник / сост.: И. Н. Кулан, В. И. Козак, Е. Е. Соколов ; под общ. ред. А. Н. Новикова. – Минск : БелЭн імя П. Броўкі, 2014. – С. 217.
7. Тузков, П. Партизан, солдат и Герой соцтруда / П. Тузков // Віцьбічы = Витьбичи. – 2004. – 26 июня. – С. 4.
8. Фондаренко, Н. Партизан, рабочий, депутат... / Н. Фондаренко // Витебские вести. – 2014. – 25 сент. – С. 9.
9. Цітоў Міхаіл Севасцьянавіч // Памяць: Гарадоцкі раён : гісторыка-дакументальныя хронікі гарадоў і раёнаў Беларусі / рэдкал.: Н. А. Бурунова [і інш.] ; уклад. С. І. Садоўская ; мастак Э. Э. Жакевіч. – Мінск : Беларусь, 2004. –С. 692.
10. Шилович, А. Высоты Михаила Титова / С. Судникович // Знаменосцы трудовой славы / сост.: Г. С. Гужва [и др] ; рец. Б. В. Стрельцов. – Минск : Беларусь, 1984. – С. 311–314.
11. Шыловіч, А. Ствараць заўсёды, ва ўсім / А. Шыловіч // Звязда. – 1977. – 20 крас. – С. 2.
СПАСЫЛКІ
