Зімнік Леакадзія Баляславаўна
Зімнік Леакадзія Баляславаўна нарадзілася 5 верасня 1936 года ў в. Чарняўцы Мёрскага раёна ў шматдзетнай сялянскай сям'і.
Атрымаўшы пачатковую адукацыю, дзяўчынка рана пачала працоўную дзейнасць. З 1950 года яна пачала свой працоўны шлях паляводам у сельскагаспадарчай арцелі «Гігант» (зараз філіял «Павяцце» КСУП «Чарасы») у в. Павяцце Мёрскага раёна.
З 1959 года, пераехаўшы жыць ў в. Рабечына (зараз не існуе), яна працягвала працаваць паляводам у Даўгінаўскім калгасе імя Чапаева (зараз аддзяленне «Даўгінава» ААТ «Мерыца») у в. Латышы Лявонпальскага (з 1965 года – Даўгінаўскага) сельсавета. За высокія паказчыкі па вырошчванні лёну ў 1965 годзе праўленне калгаса прызначыла Леакадзію Баляславаўну звеннявой.
Указам Прэзідыума Вярхоўнага Савета СССР ад 8 красавіка 1971 года за выдатныя поспехі, дасягнутыя ў развіцці сельскагаспадарчай вытворчасці і выкананні пяцігадовага плана продажу дзяржаве прадуктаў земляробства і жывёлагадоўлі, Зімнік Леакадзіі Баляславаўне было прысвоена званне «Герой Сацыялістычнай Працы».
Л. Зімнік неаднаразова прымала ўдзел у ВДНГ СССР, за поспехі ў развіцці сельскай гаспадаркі Галоўным выставачным камітэтам яна была адзначана медалямі, каштоўнымі падарункамі і ганаровымі дыпломамі. У 1970–1974 гг. Леакадзія Баляславаўна ўзначальвала ў калгасе звяно канчатковай прадукцыі.
Пасля смерці мужа і з-за цяжкай фізічнай траўмы Л. Зімнік пераехала ў Віцебск. У 1977–1981 гг. яна працавала на заводзе радыёдэталяў (зараз ААТ «Віцебскі завод радыёдэталяў "Маналіт"»). Потым, да самага выхаду на пенсію, – у вытворчым аб'яднанні імя 60-годдзя Беларускай ССР (зараз – ААТ «Віцебскія дываны») Міністэрства лёгкай прамысловасці БССР.
Абіралася дэпутатам Вярхоўнага Савета Беларускай ССР 8-га склікання (1971–1975 гг. – член Прэзідыума), а таксама членам савета вытворчага ўчастка, праўлення калгаса і раённага савета калгаснікаў (пазней – раённага міжкалгаснага савета), жаночага савета калгаса і іншых грамадскіх арганізацый. Дэлегат ІІІ Усесаюзнага з'езда калгаснікаў (1969).
Узнагароджана ордэнам Леніна, медалямі ВДНГ СССР.
Жыла ў Віцебску.
Памерла Леакадзія Баляславаўна 23 снежня 2012 года.
ЛІТАРАТУРА
1. Воронов, Н. Звезда ветерана / Н. Воронов // Советская Белоруссия. – 1970. – 4 марта. – С. 2.
2. Зімнік Леакадзія Баляславаўна // Памяць: Міёрскі раён : гісторыка-дакументальныя хронікі гарадоў і раёнаў Беларусі / рэдкал.: Г. М. Маняк [і інш.] ; уклад. Л. А. Матэленак ; рэд. В. І. Марціновіч ; мастак Э. Э. Жакевіч. – Мінск : Беларуская навука, 1998. – С. 516.
3. Зимник Леокадия Болеславовна // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 457.
4. Зимник Леокадия Болеславовна // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 238.
5. Зимник Леокадия Болеславовна // Твои герои, Беларусь! Герои Социалистического Труда : биографический справочник / сост.: И. Н. Кулан, В. И. Козак, Е. Е. Соколов ; под общ. ред. А. Н. Новикова. – Минск : БелЭн імя П. Броўкі, 2014. – С. 100.
6. Стоминок, Е. Школа Леокадии Зимник / Е. Стоминок // Знаменосцы трудовой славы / сост.: Г. С. Гужва [и др] ; рец. Б. В. Стрельцов. – Минск : Беларусь, 1984. – С. 111–114.
7. Стамінох, Я. Сэрца жанчыны / Я. Стамінох // Віцебскі рабочы. – 1971. – 9 крас. – С. 2.
СПАСЫЛКІ
