Зімянін Міхаіл Васільевіч
Зімянін Міхаіл Васільевіч нарадзіўся 21 лістапада 1914 года ў Віцебску ў сям'і чыгуначніка.
Працоўную дзейнасць пачаў у 1929 годзе рабочым паравозарамонтнага дэпо станцыі Ленінград – Віцебск-Таварны. З 1931 года – літработнік газеты «Калгаснік Беларусі» ў Мінску. З 1934 года пачаў працаваць у Гомельскай вобласці.
У 1936–1938 гг. праходзіў абавязковую службу ў Чырвонай Арміі. Пасля заканчэння палкавой школы Міхаіла Васільевіча прызначылі рэдактарам газеты вайсковай часці. Выпускам яе ён займаўся да канца тэрміновай службы.
У 1939 годзе скончыў Магілёўскі педагагічны інстытут і знаходзіўся на камсамольскай рабоце. Быў сакратаром Магілёўскага гаркама камсамола, першым сакратаром Магілёўскага абкама ЛКСМБ. У 1940 годзе быў абраны першым сакратаром ЦК ЛКСМБ.
У гады Вялікай Айчыннай вайны быў адным з арганізатараў антыфашысцкага падполля і партызанскага руху на тэрыторыі Беларусі. Доўгі час знаходзіўся ў тыле ворага.
З чэрвеня 1946 года – другі сакратар Гомельскага абкама КП(б)Б, са снежня 1946 года – міністр асветы БССР. У 1947 годзе быў абраны сакратаром, у 1953 годзе – другім сакратаром ЦК КП(б)Б. З 1953 года – на працы ў апараце Міністэрства замежных спраў СССР. З 1956 года працаваў Надзвычайным і Паўнамоцным паслом СССР у В'етнаме, з 1960 года – у Чэхаславакіі. У 1965 годзе – намеснік міністра замежных спраў СССР, з верасня 1965 года – галоўны рэдактар газеты «Праўда». У 1966 годзе быў абраны старшынёй праўлення Саюза журналістаў СССР.
Указам Прэзідыума Вярхоўнага Савета СССР ад 20 лістапада 1974 года Міхаілу Васільевічу было прысвоена званне «Герой Сацыялістычнай Працы».
З 5 сакавіка 1976 па 28 студзеня 1987 гг. – сакратар ЦК КПСС. З гэтай пасады Міхаіл Васільевіч у 1987 годзе выйшаў на пенсію.
Узнагароджаны ордэнамі Чырвонага Сцяга, Айчыннай вайны I ступені, Дружбы народаў, «Знак Пашаны», ордэнам Леніна (5), ордэнам Працоўнага Чырвонага Сцяга (2), медалямі.
Жыў у Маскве.
Памёр Міхаіл Васільевіч 1 мая 1995 года.
ЛІТАРАТУРА
1. Зімянін Міхаіл Васільевіч // Памяць: Віцебск : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад. А. І. Мацяюн ; мастак Э. Э. Жакевіч. – Мінск : БелЭн, 2003. – Кн. 2. – С. 484.
2. Зімянін Міхаіл Васільевіч // Энцыклапедыя гісторыі Беларусі : у 6 т. / рэдкал.: Г. П. Пашкоў [і інш.] ; мастак Э. Э. Жакевіч. – Мінск : БелЭн, 1996. – Т. 3 : Гімназіі-кадэнцыя. – С. 448.
3. Зимянин Михаил Васильевич // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 239.
4. Зимянин Михаил Васильевич // Твои герои, Беларусь! Герои Социалистического Труда : биографический справочник / сост.: И. Н. Кулан, В. И. Козак, Е. Е. Соколов ; под общ. ред. А. Н. Новикова. – Минск : БелЭн імя П. Броўкі, 2014. – С. 100.
5. Палейко, А. Как Витебску помог земляк / А. Палейко // Віцьбічы = Витьбичи. – 2018. – 1 февр. – С. 21.
6. Фалей, Е. С. Зимянин Михаил Васильевич / Е. С. Фалей // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 457.
СПАСЫЛКІ
