Дудчык Павел Андрэевіч нарадзіўся 12 ліпеня 1918 года ў в. Казёныя Поршні Аршанскага раёна ў сялянскай сям'і.

Пасля заканчэння няпоўнай сярэдняй школы працаваў у калгасе, быў сакратаром сельсавета.

У 1938 годзе П. А. Дудчык быў прызваны на службу ў Чырвоную Армію. Служыў у Сярэдняй Азіі. У 1942 годзе скончыў Бранскае ваенна-палітычнае вучылішча. З мая таго ж года – на франтах Вялікай Айчыннай вайны.

Прымаў удзел у баях на Калінінскім, Паўночна-Заходнім, 2-м Прыбалтыйскім, 1-м і 4-м Украінскім франтах. Тры разы быў паранены. Да чэрвеня 1945 года капітан Павел Дудчык камандаваў батарэяй 699-га знішчальна-супрацьтанкавага артылерыйскага палка 18-й знішчальна-супрацьтанкавай брыгады 22-й арміі 2-га Прыбалтыйскага фронту. Удзельнічаў у баях на тэрыторыі Латвійскай ССР.

Вызначыўся ў баях пад г. Ліепая і за в. Берзі (Добельскі раён, Латвія). 23 снежня 1944 года артылерыйская батарэя пад камандаваннем капітана Дудчыка за 6 гадзін адбіла 11 варожых контратак, знішчыла каля 200 гітлераўцаў, падбіла 8 танкаў і прымусіла ворага адступіць.

Указам Прэзідыума Вярхоўнага Савета СССР ад 29 чэрвеня 1945 года за «ўзорнае выкананне баявых заданняў камандавання на фронце барацьбы з нямецкімі захопнікамі і праяўленыя пры гэтым мужнасць і гераізм» капітан Павел Дудчык быў удастоены высокага звання Героя Савецкага Саюза з уручэннем ордэна Леніна і медаля «Залатая Зорка». Быў таксама ўзнагароджаны двума ордэнамі Айчыннай вайны 1-й ступені, двума ордэнамі Айчыннай вайны 2-й ступені, трыма ордэнамі Чырвонай Зоркі, шэрагам медалёў.

Пасля заканчэння вайны Дудчык працягваў службу ў Савецкай Арміі. У 1950 годзе ён скончыў Вышэйшую афіцэрскую артылерыйскую школу. У 1959 годзе ў званні палкоўніка Дудчык быў звольнены ў запас. Пражываў у г. Мінску, працаваў начальнікам штаба грамадзянскай абароны Мінскага аўтамабільнага завода.

Памёр 17 красавіка 1994 года, пахаваны ў Мінску.

ЛІТАРАТУРА

1. Веларонак, Г. У тым баі, на той вайне… / Г. Веларонак // Ленінскі прызыў (Орша). – 1985. – 1 лют. – С. 2.

2. Дудчик Павел Андреевич // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 412.

3. Дудчик Павел Андреевич // Республика Беларусь : энциклопедия : [в 6 т.] / редкол.: Г. П. Пашков [и др.]. – Минск : БелЭн, 2007. – Т. 3 : Герасименко–Картель. – С. 467.

4. Дудчик Павел Андреевич // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 42.

5. Дудчик Павел Андреевич // Твои сыновья, Беларусь! Герои Советского Союза : биографический справочник / ред.: Ю. В. Баженов [и др.] ; худ. ред. П. В. Баранов. – Минск : БелЭн імя П. Броўкі, 2015. – С. 47.

6. Дудчык Павел Андрэевіч // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад.: Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 1999. – Кн. 1. – С. 370.

7. Мамлыга, К. Вернулся домой героем / К. Мамлыга // Во славу Родины. – 1989. – 8 февр. – С. 2.

8. Сузін, Л. Батарэя, агонь! / Л. Сузін // Чырвоная змена. – 1988. – 17 лют. – С. 4.

9. Сузін, Л. Выпрабаванне агнём / Л. Сузін // Звязда. – 1981. – 13 сак. – С. 4.

10. Яфімаў, А. Героі – артылерысты / А. Яфімаў // Віцебскі рабочы. – 1971. – 19 лістап. – С. 2.