Пятаковіч Аляксандр Францавіч нарадзіўся 25 снежня 1914 года ў г. Сянно.

Да 1940 года працаваў у саўгасе Пухавіцкага раёна, потым інструктарам райкама партыі.

На фронце з лета 1941 года. Камандзір танкавага разведузвода. Штурмуючы моцна ўмацаваную паласу абароны праціўніка за Ковелем, дзе немцы сканцэнтравалі вялікую колькасць танкаў, авіяцыі, нашы войскі сустрэліся з вялікімі цяжкасцямі. Першая спроба авалодаць гэтым раёнам аказалася няўдалай. Толькі праз 18 дзён, пасля моцнай артпадрыхтоўкі, нашы войскі прайшлі адну за адной пяць ліній варожай абароны. У гэтым баі вызначылася рота, камандзірам якой быў А. Ф. Пятаковіч.

Старшы лейтэнант Пятаковіч вызначыўся ў баях за расшырэнне плацдарма на левым беразе Віслы і за горад Радам (Польшча). У час баявой разведкі 15 студзеня 1945 года ўзвод на чале з Пятаковічам разграміў варожую аўтакалону, зайшоў у фланг артдывізіёна, знішчыў 2 бронетранспарцёры, 3 гарматы і захапіў чатыры гарматы, праследуючы ворага, заняў 2-ю паласу абароны, што спрыяла поспеху наступлення. У баях за Одэр экіпаж яго танка знішчыў 8 танкаў, 8 гармат, 6 бронетранспарцёраў, 19 кулямётных кропак, узяў у палон 130 гітлераўцаў.

Званне Героя Савецкага Саюза прысвоена 24 сакавіка 1945 года.

Праз год пасля заканчэння вайны дэмабілізаваўся ў званні капітана. Жыў і працаваў на партыйнай і савецкай рабоце ў г. Мар'іна Горка Мінскай вобласці.

Узнагароджаны ордэнамі Леніна, Чырвонага Сцяга, Айчыннай вайны 1-й i 2-й ступені, медалямі.

Памёр 9 чэрвеня 1988 года.

ЛІТАРАТУРА

1. Арлоў, В. Салдат партыі / В. Арлоў // Віцебскі рабочы. – 1982. – 5 кастр. – С. 3.

2. Ермашкевіч, П. Вытокі подзвігу / П. Ермашкевіч // Ленінская іскра. – 1980. – 23 верас. – С. 3.

3. Ермашкевіч, П. Подзвігам праслаўлены / П. Ермашкевіч // Голас Сенненшчыны. – 1998. – 12 верас. – С. 2.

4. Криштопенко, Л. В годы военного лихолетья... / Л. Криштопенко // Голас Сенненшчыны. – 2017. – 6 мая. – С. 6 ; 13 мая. – С. 6.

5. Праз усю вайну // Голас Сенненшчыны. – 2014. – 20 снеж. – С. 3.

6. Пятаковіч Аляксандр Францавіч // Памяць: Сенненскі раён : гісторыка-дакументальныя хронікі гарадоў і раёнаў Беларусі / рэдкал.: У. С. Богаў [і інш.] ; уклад. С. В. Шайко ; мастак Э. Э. Жакевіч. – Мінск : Паліграфафармленне, 2003. – С 299–300.

7. Пятаковіч Аляксандр Францавіч // Яны нарадзіліся на Сенненшчыне : біяграфічны даведнік / склад. А. В. Бараноўскі. – Віцебск : ВДУ імя Машэрава, 2016. – С. 109–110.

8. Пятакович Александр Францевич // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 390.

9. Пятакович Александр Францевич // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн імя П. Броўкі, 2008. – Т. 6 : Пейзаж–Снегирёв. – С. 343.

10. Пятакович Александр Францевич // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 112.

11. Родам з Сянно // Экскурсія да вытокаў г. Сянно: (Краязнаўчы маршрут па раённым цэнтры Віцебскай вобласці) / распрацоўка В. В. Бандарэвіча. – Віцебск, 2000. – С. 183.