Шмыроў Мінай Піліпавіч (партызанскі псеўданім – Бацька Мінай) нарадзіўся 23 снежня 1891 года ў в. Пунішча Віцебскага раёна. Адзін з арганізатараў і кіраўнікоў партызанскага руху ў Віцебскай вобласці ў Вялікую Айчынную вайну.

У арміі з 1913 года. Быў удзельнікам Кастрычніцкай рэвалюцыі і грамадзянскай вайны, баёў супраць войск Краснова, Карнілава, Юдзеніча, арганізатарам першага партызанскага атрада ў Віцебскай губерні.

3 1921 г. быў камандзірам атрада па барацьбе з бандытызмам на Віцебшчыне.

У Вялікую Айчынную вайну ў ліпені 1941 г. ён арганізаваў і ўзначаліў партызанскі атрад у Суражскім раёне, які потым увайшоў у склад 1-й Беларускай партызанскай брыгады. Дарэчы, гэтая брыгада ўдзельнічала ў абароне «Віцебскіх варот». Партызаны «Бацькі Міная» наносілі ўдары па жалезных дарогах, шашы, водных камунікацыях, узрывалі масты і склады, пускалі пад адхон эшалоны гітлераўцаў. Спрабуючы захапіць партызанскага кіраўніка, фашысты ў кастрычніку 1941 г. узялі заложнікамі чатырох яго дзяцей, сястру і маці жонкі. Спробы партызан вызваліць сям'ю партызанскага камандзіра не ўдаліся. 14 лютага 1942 года пасля чатырох месяцаў катаванняў дзеці і сваякі Шмырова былі расстраляны. 15 жніўня 1944 года за мужнасць і гераізм, праяўленыя ў барацьбе супраць нямецка-фашысцкіх захопнікаў, М. П. Шмырову прысвоена званне Героя Савецкага Саюза.

Пасля вайны быў на савецкай і гаспадарчай рабоце ў Віцебску. Член ЦВК БССР у 1935–1937 гг. Дэпутат Вярхоўнага Савета БССР у 1947–1963 гг. Ганаровы грамадзянін Віцебска.

Памёр 3 верасня 1964 года.

У Віцебску яго імем названы вуліца, парк, яго імя прысвоена гарадскому прафесійна-тэхнічнаму вучылішчу. У 1969 г. адкрыты мемарыяльны музей М. П. Шмырова.

ЛІТАРАТУРА

1. Белевич, А. П. У батьки Миная / А. П. Белевич. – Минск : Политиздат, 1978. – 103 с.

2. Бялевіч, А. Мінай Шмыроў / А. Бялевіч. – Мінск : Беларусь, 1969. – 131 с.

3. Васильева, М. П. По следам героя / М. П. Васильева. – Минск : Народная асвета, 1974. – 64 с.

4. Подлипский, А. Детям батьки Миная / А. Подлипский // Народнае слова. – 2007. – 12 чэрв. – С. 6.

5. Саблин, В. В. Батька Минай : документальная повесть / В. В. Саблин. – Минск : Госиздат БССР, 1959. – 240 с.

6. Шмырев М. Ф. / авт. текста С. А. Аслезов. – Минск : Беларусь, 1978. – 32 с.

7. Шмырев Минай Филиппович // Почетные граждане белорусских городов / Б. Д. Долготович. – Минск : Беларусь, 2008. – С. 69–70.

8. Шмырев Минай Филиппович // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 149.