Спірыдзенка Мікалай Кузьміч нарадзіўся 12 студзеня 1917 года ў в. Беразуха (існавала побач з в. Мясаедава) Шумілінскага раёна.

Скончыў 7 класаў Мясаедаўскай школы (1932), фінансавы тэхнікум і аэраклуб у г. Віцебск, Барысаглебскую ваенную авіяцыйную школу лётчыкаў (1938), камандны факультэт Чырванасцяжнай Ваенна-паветранай акадэміі (1950), Ваенную акадэмію Генштаба (1957).

Працаваў бухгалтарам на віцебскай фабрыцы «Дзвіна».

З 1937 года – у Ваенна-паветраных сілах.

Удзельнічаў у савецка-фінляндскай вайне 1939–1940 гг.

У гады Вялікай Айчыннай вайны з чэрвеня 1941 года на Паўночна-Заходнім, Паўднёва-Заходнім, Заходнім і 2-м Беларускім франтах. Камандзір эскадрыллі 172-га знішчальнага палка (309-я знішчальная авіяцыйная дывізія, 4-я паветраная армія, 2-і Беларускі фронт) з 22 чэрвеня па 22 лістапада 1944 года зрабіў 337 баявых вылетаў, правёў 85 паветраных баёў, збіў асабіста 15 і ў групе – 6 самалётаў праціўніка.

23 лютага 1945 года яму прысвоена званне «Герой Савецкага Саюза».

Быў камандзірам авіяцыйнай дывізіі, з 1962 года – старшы выкладчык, потым начальнік факультэта Ваеннай акадэміі імя Ф. Э. Дзяржынскага.

У 1970 годзе ў званні генерал-маёра выйшаў у адстаўку, жыў у Маскве.

Памёр 27 снежня 1980 года, пахаваны на Кунцаўскіх могілках.

Узнагароджаны ордэнам Леніна, ордэнамі Чырвонага Сцяга (двойчы), Суворава ІІІ ступені, Айчыннай вайны І ступені, Чырвонай Зоркі (тройчы), медалямі.

ЛІТАРАТУРА

1. Ермалаеў, С. Баявы лётчык Спірыдзенка / С. Ермалаеў // Герой працы (Шумiлiна). – 2012. – 13 студз. – С. 2.

2. Спириденко Николай Кузьмич // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 488.

3. Спириденко Николай Кузьмич // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн імя П. Броўкі, 2008. – Т. 7 : Снегирь–Ящерицын. – С. 72.

4. Спириденко Николай Кузьмич // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 124.

5. Спириденко Николай Кузьмич // Твои сыновья, Беларусь! Герои Советского Союза : биографический справочник / ред.: Ю. В. Баженов [и др.] ; худ. ред. П. В. Баранов. – Минск : БелЭн імя П. Броўкі, 2015. – С. 129.

6. Спірыдзенка Мікалай Кузьміч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2002. – Т. 15 : Следавікі–Трыо. – С. 115–116.

7. Спірыдзенка Мікалай Кузьміч // Беларусь у Вялікай Айчыннай вайне 1941–1945 : энцыклапедыя / рэдкал. А. Я. Андрэеў [і інш.]. – Мінск : БелСЭ, 1990. – С. 573.