Ткачоў Іван Лявонцьевіч нарадзіўся 22 чэрвеня 1920 года ў в. Лындзіна Лёзненскага раёна ў сялянскай сям'і.

У 1939 годзе скончыў 3 курсы чыгуначнага тэхнікума ў г. Петрапаўлаўске. У гэтым жа годзе быў прызваны ў Чырвоную Армію.

На фронце ў гады Вялікай Айчыннай вайны з чэрвеня 1941 года. Удзельнічаў у абароне Севастопаля. Амаль два гады быў разведчыкам ў партызанскім атрадзе Сарокіна, які дзейнічаў у Крымскіх гарах. Пасля вызвалення Крымскага паўвострава зноў у страявых частках. Ваяваў у складзе 347-й стралковай дывізіі, удзельнічаў у вызваленні Прыбалтыкі.

31 ліпеня 1944 года ў баі за горад Елгава (Латвія) старшы сяржант Ткачоў асабіста знішчыў звыш 10 гітлераўцаў, ліквідаваў 2 агнявыя кропкі. 1 жніўня 1944 года ў ліку першых пераадолеў раку Ліелупе і падчас разведкі боем знішчыў 5 варожых пяхотнікаў.

Загадам ад 7 жніўня 1944 года старшы сяржант Ткачоў Іван Лявонцьевіч быў узнагароджаны ордэнам Славы III ступені.

28 жніўня 1944 года ў раёне хутара Міславас (Латвія) падчас контрнаступлення праціўніка старшы сяржант Ткачоў пранік у яго размяшчэнне, знішчыў разлік агнявога пункта і з захопленага кулямёта прыцэльным агнём знішчыў звыш 10 салдат і аднаго афіцэра.

Загадам ад 21 верасня 1944 года старшы сяржант Ткачоў Іван Лявонцьевіч быў узнагароджаны ордэнам Славы II ступені.

16 кастрычніка 1944 года ў раёне хутара Мулі (Літва) старшы сяржант Ткачоў ў крытычны момант бою узначаліў контратаку байцоў роты і знішчыў звыш 10 гітлераўцаў.

Указам Прэзідыума Вярхоўнага Савета СССР ад 24 сакавіка 1945 года за ўзорнае выкананне заданняў камандавання ў баях з нямецка-фашысцкімі захопнікамі старшы сяржант Ткачоў Іван Лявонцьевіч быў узнагароджаны ордэнам Славы I ступені і стаў поўным кавалерам ордэна Славы.

У 1946 годзе ў званні лейтэнанта І. Л. Ткачоў быў звольнены ў запас. Жыў у горадзе Кемерава. Працаваў выкладчыкам тэхнічнага вучылішча № 3, затым – у будаўнічым упраўленні.

Памёр Іван Лявонцьевіч 6 чэрвеня 1985 года.

Узнагароджаны ордэнамі Айчыннай вайны I ступені, Чырвонага Сцяга, ордэнамі Славы I, II, III ступеняў.

ЛІТАРАТУРА

1. Ткачёв Иван Леонтьевич // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭН, 2011. – Т. 2 : Витебская область : в 2 кн. – Кн. 2. – С. 510.

2. Ткачев Иван Леонтьевич // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 186.

3. Ткачёв Иван Леонтьевич // Твои сыновья, Беларусь! Кавалеры ордена Славы : биографический справочник / Б. Д. Долготович. – Минск : БелЭн імя П. Броўкі, 2014. – С. 51.