ЯРОНЬКА ВІКТАР ІВАНАВІЧ нарадзіўся 10 мая 1920 года ў г. Полацк.

Скончыў чыгуначную школу ФЗУ у Ціхвіне. Працаваў слесарам у Маскве, на адной з капалень «Дальстроя» ў Магаданскай вобласці.

У Чырвонай Арміі і на фронце з 1942 г. Сяржант, наводчык прылады ў 922-м стралковым палку 250-й стралковай дывізіі 3-й арміі 2-га Беларускага фронту. Удзельнічаў у баях на Бранскім фронце, у Арлоўска-Курскай бітве, вызваляў гарады Арол, Чарнігаў.

Вызначыўся пры вызваленні Гомельскай вобласці. 4 лістапада 1943 г. у баі каля с. Шарсцін Веткаўскага раёна падбіў 4 варожых танка. 24 чэрвеня 1944 г. падчас прарыву абароны праціўніка каля в. Азяраны Рагачоўскага раёна здушыў агонь 7 кулямётных кропак. 25 чэрвеня 1944 г. падбіў 2 самаходныя гарматы, паспяхова фарсіраваў р. Друць. 30 чэрвеня 1944 г. каля в. Старая Марц’янаўка падбіў 3 варожыя танкі і знішчыў 6 аўтамашын з пяхотай. 12 ліпеня 1944 г. каля в. Пяскі Мастоўскага раёна Гродзенскай вобласці, калі ўвесь яго разлік выбыў са строю, у адзіночку вёў агонь і знішчыў штурмавыя гарматы, 3 кулямёты, роту нямецкай пяхоты.

Указам Прэзідыума Вярхоўнага Савета СССР ад 26 кастрычніка 1944 г. за «мужнасць, адвагу і гераізм, праяўленыя ў барацьбе з нямецкімі захопнікамі» сяржант В. І. Яронька быў удастоены звання Героя Савецкага Саюза з уручэннем ордэна Леніна і медалі «Залатая Зорка».

Удзельнічаў у вызваленні Польшчы, баях ва Усходняй Прусіі, штурме Берліна. Пасля заканчэння вайны вярнуўся ў Полацк, актыўна ўдзельнічаў у аднаўленні разбуранага вайной горада і будаўніцтве Наваполацка. Працаваў слесарам-інструментальшчыкам у трэсце № 16 «Нафтастрой».

Узнагароджаны ордэнамі Леніна, Кастрычніцкай Рэвалюцыі, Чырвонага Сцяга, Айчыннай вайны I ступені, Славы III ступені, медалямі. Заслужаны рацыяналізатар Беларусі, ганаровы будаўнік Наваполацка.

Памёр Віктар Іванавіч 15 верасня 1991 года.

Адна з вуліц г. Наваполацка названа ў яго гонар. У 2007 годзе. каля дома № 32 па вул. Я. Коласа ў Наваполацку адкрыта мемарыяльная дошка ў памяць аб В. І. Яронька.

У 1985 г. прысвоена званне «Ганаровы грамадзянін горада Наваполацка».

ЛІТАРАТУРА

1. Еронько Виктор Иванович // Почетные граждане белорусских городов : биографический справочник / Б. Д. Долготович. – Минск : Беларусь, 2008. – С. 88.

2. Еронько Виктор Иванович // Почетные граждане города Новополоцка / [сост. С. Б. Филиппенкова ; ред. совет: Н. М. Марченко, В. К. Мартыненко, М. В. Караваева]. – Новополоцк : ПГУ, 2015. – С. 22.

3. Еронько Виктор Иванович // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 44.

4. Сопікава, В. Герой вызвалення / В. Сопікава // Рэспубліка. – 2010. – 19 чэрв. – С. 5.

5. Сопікава, В. Ён жыў, жыве і будзе вечна жыць! / В. Сопікава // Новая газета (Наваполацк). – 2010. – 8 мая. – С. 2.

6. Факеев, В. Они сражались за Родину / В. Факеев // Новая газета (Наваполацк). – 2014. – 5 июля. – С. 13.

7. Факеев, В. Оружие Победы / В. Факеев // Новополоцк сегодня. – 2016. – 6 мая. – С. 13 ; 27 мая. – С. 14 ; 21 июня. – С. 3 ; 1 июля. – С. 4.