Клопаў Аніс Андрэевіч нарадзіўся 14 мая 1914 года ў в. Наваселле Ушацкага раёна. Працаваў у калгасе. У Чырвонай арміі з 1938 года. Удзельнічаў у вызваленчым паходзе савецкіх войск у Заходнюю Беларусь (1939).

На фронце з самага пачатку Вялікай Айчыннай вайны. Змагаўся на Заходнім, Калінінскім, 1-м Прыбалтыйскім і 1-м Беларускім франтах. Вызваляў Беларусь і Літву. Ваяваў спачатку ў пяхоце, а затым быў пераведзены ў 4-ю асобную штурмавую брыгаду.

Сапёр-кулямётчык 20-га асобнага штурмавога інжынерна-сапёрнага батальёна малодшы сяржант Клопаў асабліва вызначыўся ў баях на тэрыторыі Усходняй Прусіі 10 студзеня 1945 года, калі на чале групы ў непасрэднай блізкасці ад праціўніка зрабіў праход у драцяной загародзе і мінным полі. Быў узнагароджаны ордэнам Славы III ступені.

16 лютага 1945 года адным з першых фарсіраваў р. Штадрык і знішчыў з кулямёта каля 20 гітлераўцаў. Быў кантужаны, але працягваў ваяваць. Загадам ад 24 сакавіка 1945 года малодшы сяржант Клопаў Аніс Андрэевіч узнагароджаны ордэнам Славы II ступені.

У красавіку 1945 года ў час прарыву абароны на падыходзе да Кёнігсберга А. А. Клопаў са сваім аддзяленнем зрабіў праход у мінным полі, разам з пяхотай уварваўся ў варожыя траншэі і знішчыў 13 гітлераўцаў, паранены працягваў бой.

Але чарговую ўзнагароду атрымаў толькі ў маі 1946 года. За ўзорнае выкананне заданняў камандавання ў баях з нямецка-фашысцкімі захопнікамі Прэзідыум Вярхоўнага Савета СССР узнагародзіў яго ордэнам Славы I ступені. І малодшы сяржант Клопаў Аніс Андрэевіч стаў поўным кавалерам ордэна Славы.

Узнагароджаны ордэнамі Чырвонай Зоркі і Айчыннай вайны I ступені, медалямі.

Удзельнік гістарычнага Парада Перамогі 24 чэрвеня 1945 года ў Маскве. Дэмабілізаваны сяржант А. А. Клопаў у 1945 годзе.

У 1953 годзе вярнуўся на радзіму, жыў ва Ушачах. Працаваў у міліцыі, потым на прамкамбінаце. У 1992 годзе ўдастоены звання «Ганаровы грамадзянін г. п. Ушачы».

Памёр Аніс Андрэевіч Клопаў 4 лютага 1995 года.

ЛІТАРАТУРА

1. Багдановіч, Н. Героем сябе не лічыў / Н. Багдановіч // Патрыёт (Ушачы). – 2014. – 28 мая. – С. 2.

2. Буевич, Т. Они вынесли на себе все тяготы тех лет / Т. Буевич // Віцьбічы = Витьбичи. – 2014. – 2 июля. – С. 4.

3. Клопаў Аніс Андрэевіч : [некралог] // Патрыёт (Ушачы). – 1995. – 11 лют. – С. 4.

4. Клопаў Аніс Андрэевіч // Памяць: Ушацкі раён : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.] ; уклад. М. М. Кірпіч ; мастак Э. Э. Жакевіч. – Мінск : Белта, 2003. – С. 252–253.

5. Клопов Анис Андреевич // Навечно в сердце народном / редкол.: И. П. Шамякин [и др.]. – 3-е изд., доп. и испр. – Минск : БелСЭ им. П. Бровки, 1984. – С. 230.

6. Клопов Анис Андреевич // Почетные граждане белорусских городов : биографический справочник / Б. Д. Долготович. – Минск : Беларусь, 2008. – С. 117.

7. Клопов Анис Андреевич // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 494.

8. Клопов Анис Андреевич // Слава и гордость земли Витебской : биографический справочник / сост. М. Н. Пригожий ; ред. кол.: М. П. Кузьмич [и др.]. – Витебск : Витебская областная типография, 2009. – С. 180.

9. Клопов Анис Андреевич // Твои сыновья, Беларусь! Кавалеры ордена Славы : биографический справочник / Б. Д. Долготович. – Минск : БелЭн імя П. Броўкі, 2014. – С. 45.

10. 1418 дней и ночей // Хроника солдатской славы / Н. Н. Беляев, А. Н. Сысоев. – Минск : Беларусь, 1970. – С. 68–71.

11. Цітоў, І. Баец штурмавога батальёна / І. Цітоў // Чырвоная змена. – 1975. – 9 мая. – С. 3.

12. Шкленнік, В. Дарогамі славы / В. Шкленнік // Звязда. – 2020. – 26 лют. – С. 3.