Батальёнак Ягор Ягоравіч нарадзіўся 19 верасня 1946 года ў в. Вялікія Труханавічы Чашніцкага раёна. Пасля заканчэння Грынькоўскай сярэдняй школы паступіў вучыцца на мастацка-графічны факультэт Віцебскага педагагічнага інстытута, які скончыў у 1968 годзе.

Працаваў у Бягомльскай школе-інтэрнаце, у Рэспубліканскай школе-інтэрнаце па музыцы і выяўленчым мастацтве. З 1974 года пачаў браць удзел у мастацкіх выставах.

З 1981 года – член Саюза мастакоў Беларусі. Прымаў удзел у шматлікіх выставах у Мінску, Маскве, Санкт-Пецярбургу, Кіеве, Іспаніі, Галандыі, Арабскіх Эміратах, Італіі, Польшчы, Германіі. Супрацоўнічаў з нямецкай фірмай па продажы твораў мастацтва «Мікалай і сын» (1989–1992).

У 1996 годзе атрымаў Першую прэмію прадстаўніцтва ААН у Беларусі за жывапісны твор «Повязь».

Гарманічнае зліццё з прыродай, гармонія сусвету і чалавека, любоў да роднага краю – аснова творчасці мастака. Праз свае мастацкія творы Ягор Батальёнак перадае людзям адчуванне радасці і шчасця, з дапамогай мастацкіх сродкаў адлюстроўвае простыя і кожнаму зразумелыя ісціны і паняцці чалавечага быцця.

Акварэлі і пастэлі, творы жывапісу мастака асабліва дарагія і зразумелыя. Яны ўвасабляюць веліч і прывабнасць знаёмых да драбніц родных краявідаў. У мяккіх светлых мажорных творах «Дзяцінства светлы дзень» (1981), «Прастора», «З нізкі», «Родны край» (1993–1994), «Дзе сон-трава» (1986), «Белая царква» (1991), «Улетку» (1989) і іншых паўстае прыгажосць краю, яго адметнасць і хараство.

Жыве ў Мінску.

ЛІТАРАТУРА

1. Аскера, В. Мастацтва інтанацыі ў пейзажах Ягора Батальёнка. / В. Аскера // Літаратура і мастацтва. – 2016. – 23 верас. – С. 16.

2. Дзеячы культуры і навукі – ураджэнцы Чашніччыны // Гістарычна-краязнаўчы курс «Наша Чашніччына». Чашніказнаўства / В. В. Грыбко. – Мінск : Медисонт, 2007. – С. 138–149.

3. Стукалова, Н. Источник вдохновения / Н. Стукалова // Чырвоны прамень (Чашнікі). – 2016. – 29 кастр. – С. 4.

4. Торбіна, І. Святло малой радзімы / І. Торбіна // Літаратура і мастацтва. – 2009. – 27 лістап. – С. 16.

5. Торбина, И. Художник и война / И. Торбина // Чырвоны прамень (Чашнікі). – 2016. – 7 мая. – С. 1, 5.

6. Трыгубовіч, В. Ягор Батальёнак / В. Трыгубовіч // Маладосць. – 1990. – № 8. – С. 96–97.

7. Фатыхава, Г. А святло – як фіранка свету... / Г. Фатыхава // Лiтаратура i мастацтва. – 2006. – 6 студз. – С. 10.