Іваноў Уладзімір Усцінавіч нарадзіўся 25 красавіка 1949 года ў былой в. Мурожніца Шумілінскага раёна.

Скончыў сярэднюю школу № 2 г. Наваполацка, мастацка-графічны факультэт Віцебскага педагагічнага інстытута (1971). Вучыўся ў Ф. Гумена, І. Сталярова.

З 1980 года ўдзельнічае ў мастацкіх выстаўках. З 1988 года з'яўляецца членам Беларускага Саюза мастакоў.

З 1971 года – настаўнік выяўленчага мастацтва сярэдняй школы № 4 г. Наваполацка, з 1973 года – мастак Наваполацкага філіяла Мастацкага фонду БССР, у 1979 годзе працаваў у творчай групе «Нафтаправод «Дружба».

У 1988–1992 гг. – дырэктар камбіната «Мастацтва» (Віцебск), у 1995–2001 гг. – старшыня Віцебскага абласнога аддзялення Беларускага Саюза мастакоў.

Працуе ў акварэлі, пераважна ў жанры нацюрморта і лірычнага пейзажа.

Сярод твораў: тэматычныя кампазіцыі «Стаялі насмерць» і «Памяць» (абедзве 1985), пейзажы «Полацк – сведка стагоддзяў» (1980), «Месяц над возерам» (1985), «Край блакітных азёр» (1986), «Раніца ў Браславе» (1987); цыкл «Далёкі ўсход» (1990), «Раніца», «Беларуская святыня» (абодва 1995), «Браслаўшчына», «Сведка стагоддзяў», «Вулачка ў старым горадзе» (усе тры 1996), «Спаса-Еўфрасіннеўская царква ў Полацку» (1998), «Задзвінне» (2000), «Вясна» (2001); нацюрморты «Вярба» (1986), «Нацюрморт з трубой, ракушкамі і марскімі вожыкамі», «Кета» (абодва 1990), «Палявыя кветкі» (1992), «Сланечнікі» (2003), серыя «Кветкі» (2004–2006) і інш.

Творы знаходзяцца ў Полацкай карціннай галерэі, Віцебскім мастацкім музеі.

Жыве ў г. Віцебску.

ЛІТАРАТУРА

1. Аляксеенка, М. У гасцях у знакамітага земляка / М. Аляксеенка // Герой працы (Шумiлiна). – 2010. – 10 сак. – С. 4.

2. Владимир Иванов [Изоматериал] / авт. текста Н. Гугнин ; ред. Л. М. Климанский. – Минск : Белта, 1991. – 15 с.

3. Гатоўская, Л. Зачараванне застылай паэзіі / Л. Гатоўская // Аршанская газета. – 2002. – 4 крас. – С. 3.

4. Дружкова, К. «Цветы для влюбленных» / К. Дружкова // Віцебскі рабочы. – 2003. – 12 лют. – С. 3.

5. Іваноў Уладзімір Усцінавіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1998. – Т. 7 : Застаўка–Кантата. – С. 154.

6. Іваноў Уладзімір Усцінавіч // Беларускі Саюз Мастакоў = Belarussian Union of Artists : энцыклапедычны даведнік / аўт.-склад.: Б. А. Крэпак [і інш.]. – Мінск : Кавалер Паблішэрс, 1998. – С. 218.

7. Іваноў Уладзімір Усцінавіч // Сучасныя мастакі Віцебшчыны / склад. В. І. Аліева, рэд. Н. В. Курсо. – Віцебск, 1994. – С. 41.

8. Крупица, Н. Лирика монументального ириса / Н. Крупица // Віцьбічы = Витьбичи. – 2009. – 14 мая. – С. VII.

9. Цыбульский, М. Л. Иванов Владимир Устинович / М. Л. Цыбульский // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 460.