КАНЦАВОЙ МІХАІЛ ПЯТРОВІЧ нарадзіўся 19 лістапада 1949 года ў г. Барань, беларускі мастак.

У 1976 годзе скончыў Мінскае мастацкае вучылішча. Вучыўся ў І. Краўчанкі. 3 1987 года кіраўнік мастацка-ліцейнага прадпрыемства «Адраджэнне рамёстваў» у Мінску. Член Беларускага саюза мастакоў з 1990 года.

Удзельнік мастацкіх выстаў з 1977 года. Працуе ў галіне станковай, манументальна-дэкаратыўнай скульптуры.

Асноўныя творы: помнікі М. Казлоўскаму ў в. Гапонавічы Мінскай вобласці, А. Гараўцу ў Віцебску (у сааўт.); кампазіцыі «Цяжкавагавікі», «Вяртанне. Прысвячэнне М. Багдановічу», «Успаміны маёй маці», «Перамога», «Чорная кветка», «З глыбіні стагоддзяў», «Сляпец» і інш.; серыя «Чарнобыль». Яму належыць дэкаратыўнае афармленне Нясвіжскага парку.

Творы мастака знаходзяцца ў Нацыянальным мастацкім музеі Беларусі.

ЛІТАРАТУРА:

1. Канцавой Міхаіл Пятровіч // Беларускі Саюз Мастакоў = Belarussian union of artists : энцыклапедычны даведнік / аўт.-склад.: Б. А. Крэпак [і інш.]. – Мінск : Кавалер Паблішэрс, 1998. – С. 243.

2. Канцавой Міхаіл Пятровіч // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад.: Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 424.