Лі Соф'я Дзмітрыеўна нарадзілася 12 красавіка 1904 года ў в. Обаль Сенненскага раёна.

У 1928–1931 гг. вучылася ў Віцебскім мастацкім тэхнікуме (настаўнікі: М. Эндэ, У. Хрусталёў).

Выйшла замуж за лётчыка-карэйца, які прыняў савецкае грамадзянства.

У мастацкіх выстаўках пачала ўдзельнічаць з 1929 года. Працавала пераважна ў жанрах пейзажа, нацюрморта і сюжэтна-тэматычнай карціны. Для яе твораў характэрна кампазіцыйная дакладнасць, каларыстычная гучнасць, пластычная завершанасць.

У часы Вялікай Айчыннай вайны – сувязная і разведчыца, парторг партызанскага атрада «Перамога» брыгады «Полымя» Пухавіцкага раёна, член бюро Пухавіцкага падпольнага райкама партыі.

Член Беларускага саюза мастакоў (1946).

Уражанне ад перажытага ў час вайны адбілася на яе творчасці. Сярод карцін на тэму партызанскага жыцця вылучаюцца: «За баявой вучобай», «Партызанскі лагер» (1943), «Партызанская прысяга» (1944), «Партызаны ў вёсцы» (1946), «Партызанка ў дазоры» (1947), «У тыле ворага» (1967), «Партызанская зямлянка» (1968), «У дазоры» (1972), «Ой, бярозы ды сосны, партызанскія сёстры» (1975), «Тэрміновае данясенне» (1979).

Удалымі па жывапісных якасцях і кампазіцыі атрымаліся работы: «На вучэнні» (1968), «Кубак чэмпіёна» (1969), «Высокае напружанне» (1974).

3 асаблівым натхненнем малявала мастачка беларускую прыроду: «Дубкі» (1962), «Нарач» (1968), «На Лепельшчыне» (1976), «Бэз» (1956), «Півоні» (1958), «Макі» (1965).

Заслужаны работнік культуры Беларусі (1975).

Узнагароджана ордэнамі Чырвонай Зоркі, «Знак Пашаны», медалямі.

Яе творы знаходзяцца ў Нацыянальным мастацкім музеі Беларусі, Беларускім музеі гісторыі Вялікай Айчыннай вайны, Гродзенскім гісторыка-археалагічным музеі, Гомельскім і Столінскім краязнаўчых музеях.

Памерла Соф'я Дзмітрыеўна 4 верасня 1980 года.

ЛІТАРАТУРА

1. Ганчароў, М. «Ой, бярозы ды сосны...» / М. Ганчароў // Работніца і сялянка. – 1976. – № 4. – С. 18–19.

2. Дзмітрыева, Р. «Віцебшчына – мая Радзіма» / Р. Дзмітрыева // Літаратура і мастацтва. – 1975. – 17 кастр. – С. 9.

3. Лі Соф'я Дзмітрыеўна // Яны нарадзіліся на Сенненшчыне : біяграфічны даведнік / склад. А. В. Бараноўскі. – Віцебск : ВДУ імя Машэрава, 2016. – С. 86–87.

4. Лі Соф'я Дзмітрыеўна // Памяць: Сенненскі раён : гісторыка-дакументальныя хронікі гарадоў і раёнаў Беларусі / рэдкал.: У. С. Богаў [і інш.] ; уклад. С. В. Шайко ; мастак Э. Э. Жакевіч. – Мінск : Паліграфафармленне, 2003. – С. 551.

5. Лі Соф'я Дзмітрыеўна // Беларускі саюз мастакоў: 1938–1998 : энцыклапедычны даведнік / аўт.-склад.: Б. А. Крэпак [і інш.]. – Мінск : ВТАА «Кавалер Паблішэрс», 1998. – С. 316.

6. Сакалоў, У. Подых славы партызанскай / У. Сакалоў // Літаратура і мастацтва. – 1974. – 1 мая. – С. 11.

7. Соф'я Дзмітрыеўна Лі // Літаратура і мастацтва. – 1980. – 12 верас. – С. 15.

8. Фатыхава, Г. Лі Соф'я Дзмітрыеўна / Г. Фатыхава // Энцыклапедыя гісторыі Беларусі : энцыклапедыя : у 6 т. / рэдкал.: Г. П. Пашкоў [і інш.]. – Мінск : Беларуская энцыклапедыя імя П. Броўкі, 1997. – Т. 4 : Кадэты–Ляшчэня. – С. 361.

9. Шалянкова, І. М. Лі Соф'я Дзмітрыеўна / І. М. Шалянкова // Энцыклапедыя літаратуры і мастацтва Беларусі : у 5 т. / рэдкал.: І. П. Шамякін [і інш.]. – Мінск : Беларуская Савецкая Энцыклапедыя імя П. Броўкі, 1986. – Т. 3 : Карчма–Найгрыш. – С. 250.