Маркавец Віктар Пятровіч нарадзіўся 5 жніўня 1947 года ў г. Докшыцы. Беларускі мастак. У 1971 годзе скончыў Беларускі тэатральна-мастацкі інстытут. Вучыўся ў І. Ахрэмчыка. Сам быў выкладчыкам Акадэміі мастацтваў. З яго курсаў выйшлі вядомыя сёння мастакі і пісьменнікі.

Працаваў у розных жанрах станковага жывапісу. Галоўнай тэмай мастацтва В. Маркаўца, яго творчых памкненняў застаюцца думкі пра радзіму бацькоў, пра Докшыцкі край, куды ён бясконца вяртаецца з блізкіх і далёкіх паездак, якія толькі пашыраюць яго творчае бачанне, даюць магчымасць яшчэ глыбей зразумець каштоўнасць адвечнага, традыцый, памяці. Віктарам Маркаўцом напісана звыш 200 карцін, якія экспанаваліся больш як на 20 персанальных і шматлікіх групавых рэспубліканскіх выстаўках, набылі вядомасць на радзіме і за мяжой. Ён рэканструяваў партрэты значных дзеячаў беларускай гісторыі і культуры – У. Сыракомлі, В. Дуніна-Марцінкевіча і яго дачкі Камілы, бацькоў Якуба Коласа і Янкі Купалы. Стварыў сэрыю прац, прысвечаных К. Каліноўскаму.

Віктар Пятровіч Маркавец – удзельнік мастацкіх выставак з 1971 года. Сярод найбольш значных персанальных выставак мастака: «Заслаўе – старажытны горад» (1991), «Старонкі гісторыі Заслаўя» (1996), «Вайшкунскі краявід» (1998), «Гістарычныя вобразы ў маляванках Віктара Маркаўца» (1993, штат Нью-Джэрсі, США), «Гістарычныя імпрэсіі» (1993, Польшча), выстаўкі-рэканструкцыі старонак гісторыі Заслаўя (2001–2002). Удзельнічаў у мастацкіх пленэрах і выстаўках, прысвечаных памяці Я. Драздовіча (2001–2002), Т. Касцюшкі (2002), акцыях памяці беларускай мастачкі Г. Русак і інш.

Ён спраектаваў і распісаў царкву ў Заслаўі, аднаўляў роспісы Свята-Пакроўскай (Докшыцы) і Свята-Георгіеўскай (Сітцы) цэркваў, стварыў два праекты з Алесем Разанавым, у тым ліку знакамітыя «Яйкаквадраты». Апошнія гады ладзіў выставы ў фальварку «Добрыя мыслі», займаўся аздабленнем дзвярэй, шафаў.

Творы мастака знаходзяцца ў Нацыянальным мастацкім музеі Беларусі, фондах Беларускага саюза мастакоў, Літаратурным музеі М. Багдановіча, Музеі сучаснага выяўленчага мастацтва, Літаратурна-мемарыяльным музеі Якуба Коласа (Мінск), гісторыка-культурным запаведніку ў Заслаўі, Магілёўскім абласным мастацкім музеі імя П Масленікава, выставачным аб'яднанні «Цэнтральны Дом мастака» ў Маскве, Музеі беларускай культуры ў г. Гайнаўка (Польшча), у прыватных зборах за мяжой і на радзіме.

Лаўрэат прэміі Ленінскага камсамола Беларусі (1980).

Сябра Беларускага саюза мастакоў з 1977 года.

Памёр Віктар Пятровіч Маркавец 17 верасня 2013 года.

ЛІТАРАТУРА

1. Вярэміч, М. Час яшчэ не настаў / М. Вярэміч // Мастацтва. – 1997. – № 11. – С. 42–47.

2. Гаранская, Т. «Вясна на Докшыцкай зямлі» / Т. Гаранская // Мастацтва Беларусі. – 1991. – № 12. – С. 16–22.

3. Малевіч, Я. Роздум / Я. Малевіч // Родныя вытокі (Докшыцы). – 2017. – 29 крас. – С. 4.

4. Маркавец Віктар Пятровіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2000. – Т. 10 : Малайзія–Мугаджары. – С. 114.

5. Маркавец Віктар Пятровіч // Памяць: Докшыцкі раён : гісторыка-дакументальныя хронікі гарадоў і раёнаў Беларусі / рэдкал.: Г. П. Пашкоў [і інш.] ; уклад. А. В. Скараход ; мастак Э. Э. Жакевіч. – Мінск : БелЭн, 2004. – С. 628–631.

6. Марозаў, В. Без прыгажосці не пражыць / В. Марозаў // Віцебскі рабочы. – 1991. – 8 чэрв. – С. 4.