Саўчанка Аляксандр Аляксандравіч нарадзіўся ў 1964 годзе ў вёсцы Велеўшчына Лепельскага раёна, у сям'і, дзе гадавалася пяцёра дзяцей.

Вучыўся ў радыётэхнічным вучылішчы, які кінуў праз тры месяцы. Год працаваў трактарыстам у калгасе і рыхтаваўся на «худграф».

Паступіў на мастацка-графічны факультэт Віцебскага педінстытута, які скончыў у 1989 годзе. Пасля першага курса яго забралі ў войска. Служыў год у Печах, затым – у Гродна (у майстэрні дывізіі – афармляў музей баявой славы).

Некаторы час жыў у Баранавічах, пасля вярнуўся на Лепельшчыну.

Зараз працуе ў Лепельскай школе мастацтваў.

Аляксандр Саўчанка ўдзельнічае ў раённых («Фарбы Лепельшчыны»), абласных, рэспубліканскіх (метадычная выстава выкладчыкаў мастацкіх школ) і міжнародных выставах. Так, у 1996, 1998, 2001 і 2017 гг. прайшлі выставы ў Лепелі і Ушачах.

Персанальныя выставы адбыліся ў Віцебскім краязнаўчым музеі (2000), Лепельскім раённым краязнаўчым музеі (2009, 2018).

Працуе ў стылях сакральны жывапіс і іканапіс, таксама займаецца разьбой па дрэве.

Мастацкія творы: «Сланечнікі», «Астры», «Дзікая ружа», «Бэз» і іншыя.

У 2017 годзе ў касцёле рабіў «Крыжовы шлях».

Штогод ездзіць на мастацкія пленэры – па Васілю Быкаву, Язэпу Драздовічу і іншым.

Яго пейзажы і нацюрморты знаходзяцца ў прыватных калекцыях аматараў жывапісу краін блізкага і далёкага замежжа. Большасць работ прысвечаны лепельскім краявідам.

ЛІТАРАТУРА

1. Бандарэвіч, В. Выстава ў фарбах / В. Бандарэвіч // Голас Сенненшчыны. – 2005. – 8 кастр. – С. 2.

2. Міхно, У. Лебядзіная вернасць / У. Міхно // Лепельскі край. – 2017. – 14 лістап. – С. 5.

3. Николаев, Е. Философия пейзажа / Е. Николаев // Лепельскі край. – 2017. – 14 лістап. – С. 8.

4. Пашковіч, А. Запрашае выстава / А. Пашковіч // Патрыёт ( Ушачы ). – 2001. – 7 лют. – С. 4.

5. Шушкевіч, У. І вечная вясна / У. Шушкевіч // Лепельскі край. – 2008. – 24 снеж. – С. 1.