Цыбульскі Міхаіл Леанідавіч
Цыбульскі Міхаіл Леанідавіч нарадзіўся 10 ліпеня 1961 года ў Віцебску. Беларускі мастацтвазнаўца, педагог, мастак.
У 1983 годзе скончыў мастацка-графічны факультэт Віцебскага дзяржаўнага педагагічнага інстытута імя С. М. Кірава, у 1987 годзе – аспірантуру Інстытута мастацтвазнаўства, этнаграфіі і фальклору Акадэміі навук БССР, у 2004 годзе – дактарантуру.
Кандыдат мастацтвазнаўства (1989), дацэнт (1992). З 1988 года працуе ў Віцебскім дзяржаўным педагагічным інстытуце (зараз – Віцебскі дзяржаўны ўніверсітэт імя П. М. Машэрава): старшым выкладчыкам (1990), дацэнтам кафедры мастацтваў (1992), загадчыкам кафедры мастацтваў (2004–2005), дацэнтам кафедры выяўленчага мастацтва (2005). З 1999 года – член Беларускага саюза мастакоў.
Даследуе праблемы тэорыі і гісторыі мастацтва, пытанні паэтыкі і стылістыкі беларускага жывапісу XX ст.. Адзін з суаўтараў шасцітомніка «Гісторыя беларускага мастацтва», аўтар значнай колькасці артыкулаў у шматтомным выданні «Беларуская энцыклапедыя», у часопісах «Мастацтва», «Беларусь», «Народная асвета», «Маладосць», уступных артыкулаў да каталогаў, альбомаў пра віцебскіх мастакоў.
У якасці куратара прымаў удзел у рэалізацыі групавых праектаў «Акварэльная садружнасць», «Знакі часу», «Віцебскі вакзал», «Дыялогі мастацкіх школ», «Замак», «Была вайна», арганізацыі выстаў аб'яднання «Віцебская акварэль», персанальных выстаў шэрагу віцебскіх мастакоў.
Стварае кампазіцыі ў алейным і гуашавым жывапісе. Яго творам уласцівы: эмацыянальная выразнасць, рэалістычная трактоўка матываў і вобразаў, экспрэсія, насычаны каларыт.
Сярод твораў: пейзажы «Сафія Полацкая» (1985), «Чырвоныя дрэвы» (1985), «Храм у Мазыры» (1999), «Падсвілле. Зімовы пейзаж» (2000), «Сцяжынкамі Драздовіча» (2000), «Мара пра сонечныя дні» (2000), «Восень у парку» (2000), «Даўгаўпілс. Ля касцёла» (2000), «Вечар. Сядзіба Яна Райніса» (2000), «Зімой» (2001), «Могілкі каля храма» (2001), «Сакавіцкае сонца» (2001), «У лесе» (2001), «Апошнія промні сонца» (2002), «Двое ў ночы» (2002), «Стары дворык» (2002), «Плошча перад ратушай» (2004), «Рамантычны матыў» (2004), «Храм» (2005), «Раніца» (2005), «Рыбацкія баркасы» (2009), «На ўскраіне вёскі» (2009), «На пленэры. Поўдзень» (2009); партрэтныя кампазіцыі «Баба Дуня» (1985), «Надзея» (1989), «Аўтапартрэт» (2007); нацюрморты «Ружы» (1992), «Кераміка і кветкі» (1999), «Ружы і шкло» (1999), «Самотны настрой» (2000), «Дэкаратыўны нацюрморт» (1999), «Зайздрасць» (2003) і інш.
Жыве ў г. Віцебску.
ЛІТАРАТУРА
1. Булаўка, В. Мастак, навуковец, крытык / В. Булаўка // Мы і час (Віцебск). – 2011. – 16 лістап. – С. 4.
2. Дуброўская, А. Гонар нашага ўніверсітэта / А. Дуброўская // Мы і час (Віцебск). – 2016. – 12 сак. – С. 1.
3. Дуброўская, А. «Мімалётныя ўражанні» Міхася Цыбульскага / А. Дуброўская // Мы і час (Віцебск). – 2017. – 16 снеж. – С. 3.
4. Міхаіл Цыбульскі // Саюз творцаў [Выяўленчы матэрыял] = A Union of creators : фотаальбом / уклад. і аўт. тэксту М. Цыбульскі ; аўт. уступ. арт. У. Андрэйчанка ; фота: В. Балоціна, М. Цыбульскага. – Мінск : Беларусь, 2005. – С. 132.
5. Цыбульскі Міхаіл Леанідавіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2003. – Т. 17 : Хвінявічы–Шчытні. — С. 138.
6. Цыбульский Михаил Леонидович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 573.
7. Шар, А. Рамантыкі / А. Шар // Культура. – 2005. – 28 мая–3 чэрв. – С. 7.
СПАСЫЛКІ
