Жарнасек Васіль Сцяпанавіч – адзін з самых вядомых у Беларусі самадзейных мастакоў.

Нарадзіўся ў 1929 годзе ў вёсцы Сітнікі Лепельскага раёна.

Пазней з бацькамі пераехаў у Лепель, дзе вучыўся ў сярэдняй школе № 1.

У гады Вялікай Айчыннай вайны ў выніку трагічнага выпадку страціў правую руку і вока ў 12-гадовым узросце.

Некаторы час распісваў дываны і тым самым зарабляў на жыццё. Пазней мастак аддаў перавагу станковаму жывапісу. Пераважна пісаў пейзажы і нацюрморты.

З сярэдзіны 1970-х гадоў працаваў на пасадзе мастака-афарміцеля ў Лепельскай гарадской аўтабазе.

У 1995 годзе Васіль Жарнасек прымаў удзел у першай міжнароднай выставе прымітыўнага жывапісу ў Мінску.

Удзельнічаў ва ўсесаюзных, замежных, рэспубліканскіх і абласных выставах.

Васіль Сцяпанавіч Жарнасек стаў лаўрэатам другога Усесаюзнага фестывалю народнай творчасці.

Сярод твораў: «Бярозкі» (1979), «Світанак» (1970), «Пейзаж з возерам» (1978), «Возера Жэдліна», «Лясное возера» (1979), «Абеліск», «Зімовы пейзаж», «Бярэзінскі запаведнік», «Родныя мясціны», «Статак», «Бэз», «Лепельшчына» (1978) і многія іншыя.

Яго карціны экспанаваліся ў музеях Мінска, Масквы, Кіева, Адэсы, Сімферопаля, Ніжняга Ноўгарада, Урэнгоя, Віцебска, Лепеля. Многія работы мастака захоўваюцца ў Нацыянальным мастацкім музеі Беларусі (Мінск), Траццякоўскай галерэі (Масква), у іншых музеях і прыватных калекцыях.

Больш за 80 карцін захоўваюцца ў фондах Лепельскага Дома рамёстваў і Лепельскага краязнаўчага музея.

Яго хвоі сталі эмблемай мастацкага салона-крамы «Скарбонка».

Памёр у жніўні 1998 года.

Пахаваны ў Лепеле. На яго магіле ўстаноўлены гранітны помнік. На ім партрэт і надпіс «Народнаму мастаку – удзячныя лепельчане».

ЛІТАРАТУРА

1. Бородейко, Л. Народному художнику – благодарные лепельчане / Л. Бородейко // Народнае слова. – 2002. – 2 лістап. – С. 6.

2. Гарбачоў, М. «Творчасць – працяг душы» / М. Гарбачоў // Лепельскі край. – 2009. – 30 кастр. – С. 7.

3. Телятко, Е. Прославил Лепель на весь мир / Е. Телятко // Віцебскі рабочы. – 2002. – 27 жн. – С. 4.

4. Шаура, Р. Васіль Жарнасек / Р. Шаура // Мастацтва. – 1996. – № 6. – С. 59–61.

5. Шлег, Т. Жменька сонечных промняў / Т. Шлег // Лепельскі край. – 2006. – 24 лют. – С. 2.

6. Шпакоўская, Г. Малітва перад мальбертам / Г. Шпакоўская // Народнае слова. – 1997. – 13 лют. – С. 6.