Аршанскі Бэр Эмануілавіч нарадзіўся 30 лістапада 1883 года ў Гарадку ў яўрэйскай сям'і. Беларускі празаік, драматург, літаратуразнаўца, публіцыст. Творчыя псеўданімы: Бэр, Хаім Міхлсон, З. Б. Элензон.

Працоўную біяграфію пачаў пераплётчыкам. З юнацкіх гадоў уключыўся ў рэвалюцыйную дзейнасць.

З 1902 года жыў у Рызе. У 1908 годзе пераехаў у Вільню. У гады, калі Заходняя Беларусь і Вільня апынуліся пад польскай уладай, працаваў у падполлі. З 1913 года ў Санкт-Пецярбургу друкаваўся ў нелегальным друку. Вёў рэвалюцыйную прапаганду, за што неаднаразова быў арыштаваны.

З 1918 года – член КПСС. У 1918 годзе быў накіраваны ў г. Віцебск сакратаром губкама РСДРП. З'яўляўся членам Віцебскага губернскага Савета рабочых і салдацкіх дэпутатаў.

У 1919 годзе на падпольнай рабоце ў Літве.

У пачатку 1920-х гадоў пераехаў у Мінск. Некаторы час загадваў яўрэйскай секцыяй Інбелькульта. Потым, магчыма, працаваў у Акадэміі навук БССР. У 1930-я гады пабываў на Калыме (не выключана, што быў рэпрэсіраваны).

З 1920 года – намеснік старшыні выканкама Мінскага гарадскога Савета, наркам працы БССР. У 1925–1926 гг. рэдагаваў газету «Кастрычнік». Быў намеснікам загадчыка агітацыйна-прапагандысцкага аддзела ЦК КП(б)Б. У 1920–1926 гг. – член ЦВК БССР. У 1927 годзе накіраваны на партыйную работу ў г. Свярдлоўск. З 1929 года зноў у Мінску. Працаваў загадчыкам яўрэйскага сектара АН БССР.

Літаратурную працу пачаў у Вільні, дзе выдаў некалькі п'ес, у тым ліку драму «Пачатак усходу» пра рэвалюцыйныя падзеі 1905–1906 гг. Апублікаваў некалькі зборнікаў займальных апавяданняў для дзяцей. Некаторыя з іх прысвечаны Кастрычніцкай рэвалюцыі, грамадзянскай вайне. Даследаваў яўрэйскую літаратуру Беларусі, праблемы тэатра. П'еса Б. Аршанскага «Кроў» ставілася на сцэне яўрэйскага тэатра БССР.

Пісаў на яўрэйскай, беларускай і рускай мовах.

Памёр Бэр Эмануілавіч 15 лістапада 1945 года ў Маскве.

ЛІТАРАТУРА

1. Рэлес Р. Л. Аршанскі Бэр / Р. Л. Рэлес // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.] ; маст. рэд. В. Г. Загародні. – Мінск : БелЭн імя П. Броўкі, 1992. – Т. 1 : Абуховіч–Ватацы. – С. 106–107.

2. Аршанскі Бэр // Памяць: Гарадоцкі раён : гісторыка-дакументальныя хронікі гарадоў і раёнаў Беларусі / рэдкал.: Н. А. Бурунова [і інш.] ; уклад. С. І. Садоўская ; мастак Э. Э. Жакевіч. – Мінск : Беларусь, 2004. – С. 281–282.

СПАСЫЛКІ

 Аршанскі Бэр Эмануілавіч. Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі. 1794–1991

 Аршанскі Бэр Эмануілавіч. Нашы землякі. Городокская сеть публичных библиотек