Атрашкевіч Валерый Іосіфавіч нарадзіўся 22 красавіка 1939 года ў в. Красная Горка Ушацкага раёна ў сям'і настаўнікаў. Бацька, Іосіф Іванавіч, у 1939 годзе быў прызваны ў рады Чырвонай Арміі. У гады Вялікай Айчыннай вайны трапіў у акружэнне, пайшоў у партызаны. Загінуў у час прарыву блакады Полацка-Лепельскай партызанскай зоны ў маі 1944 года. У гады вайны В. Атрашкевіч разам з бацькамі знаходзіўся ў партызанскім атрадзе.

Скончыў Ушацкую сярэднюю школу (1956), працаваў ва Ушацкім РДК, бібліятэкарам Ушацкай дзіцячай бібліятэкі, загадчыкам Наваміраўскай хаты-чытальні. У 1957 годзе паступіў на філалагічны факультэт Полацкага педінстытута, а ў 1959 годзе ў сувязі з яго расфарміраваннем быў пераведзены ў Магілёўскі педінстытут, які скончыў у 1962 годзе. Працаваў асістэнтам, выкладчыкам кафедры беларускай мовы Магілёўскага педінстытута (1962–1968).

У 1968 годзе перайшоў на кафедру беларускай літаратуры, з 1979 года– загадчык кафедры літаратуры, кандыдат філалагічных навук (1979), дацэнт (1985).

В. І. Атрашкевіч займаўся і літаратурнай дзейнасцю, пісаў вершы. Першы яго верш апублікаваны ў газеце «Знамя юности» (1958). Аўтар навуковых работ па гісторыі беларускай літаратуры і тэксталогіі, крытычных артыкулаў і рэцэнзій па пытаннях літаратуры і тэатра, манаграфіі «Ад прататыпа да вобраза» (1984), у якой на аснове разгляду творчасці Ц. Гартнага, М. Гарэцкага, Я. Коласа даследуе праблемы аўтабіяграфізму ў беларускай савецкай мастацкай прозе.

Памёр Валерый Іосіфавіч Атрашкевіч 26 студзеня 1990 года.

ЛІТАРАТУРА

1. Атрашкевіч Валерый Іосіфавіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1996. – Т. 2 : Аршыца–Беларусцы. – С. 78.

2. Атрашкевіч Валерый Іосіфавіч // Памяць: Ушацкі раён : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.] ; уклад. М. М. Кірпіч ; мастак Э. Э. Жакевіч. – Мінск : Белта, 2003. – С. 535–536.

3. Савік, Л. С. Атрашкевіч Валерый / Л. С. Савік // Беларускія пісьменнікі : біябібліяграфічны слоўнік : у 6 т / рэдкал.: І. Э. Багдановіч [і інш.]. – Мінск : БелСЭ, 1992. –. Т. 1 : Абуховіч–Ватацы – С. 132–133.