Барадзёнак Тамара Дзмітрыеўна нарадзілася 4 мая 1959 года ў в. Матырына Ушацкага раёна. У 1978 годзе скончыла фельчарскае аддзяленне Полацкага медыцынскага вучылішча. Працуе старэйшай медыцынскай сястрой у ДУА «Яслі-сад № 1 г. п. Ушачы».

Выступае ў розных жанрах: паэзія, сатыра і гумар, проза, піша казкі для дзяцей. Песні на яе словы выконваюцца на ўрачыстых вечарах у райцэнтры і вёсках раёна. Творы на вершы Т. Барадзёнак гучаць і на сцэнах многіх замежных краін, бо ўваходзяць у рэпертуар знакамітага ансамбля «Талака». Шмат сваіх вершаў яна прысвяціла роднай Ушаччыне:

«Я атулена пяшчотай тваёй матчынай,

Услаўляць цябе гатова зноў і зноў,

Прыгажуня сінявокая Ушаччына –

Гераічны край зацішкаў і грамоў.

Нашых песень звонкіх пералівы,

Што нашу ў душы з маленства я,

Славяць памяць вечную «Прарыву»

І цябе, Ушаччына мая.

Мне чужы заморскі край не трэба,

Не хачу дзівосаў я чужых –

Так пад родным пад ушацкім небам

Люба мне ў мясцінах дарагіх».

Творы паэтэсы друкаваліся ў розных выданнях Віцебшчыны і рэспублікі: у альманаху «Дзвіна», у газеце «Літаратура і мастацтва», у календары «Родны край» і інш.

Тамара Барадзёнак – аўтар некалькіх кніг. У 1996 годзе выдала зборнік вершаў і навел «А я люблю... », у 1997 годзе – кнігу «Мелодыі душы маёй», у 1998 годзе – байкі і гумарэскі «І жартам, і ўсур'ёз». Душэўная цеплыня і любоў аўтара да роднага краю – у гэтых творах. Тамара Барадзёнак – пяшчотны лірык. Нямала яе твораў прысвечана сардэчным адносінам да людзей і паміж імі. Зборнік вершаў «Мой верасень» – працяг тых жа тэм адданасці любай зямлі і павагі да людзей.

На яе рахунку ўжо больш двух дзясяткаў зборнікаў вершаў. Апошні з іх «Святло малой радзімы» у лютым 2020 года прэзентаваўся ў раённай бібліятэцы ў рамках пасяджэння клуба цікавых сустрэч «Ушачане».

ЛІТАРАТУРА

1. Багдановіч, Н. Каб Беларусь магла спяваць / Н. Багдановіч // Патрыёт (Ушачы). – 2020. – 2 лют. – С. 8.

2. Беляжэнка, Б. «Мой верасень» / Б. Беляжэнка // Віцьбічы = Витьбичи. – 2004. – 22 июля. – С. 11.

3. Вітко, Я. Майстар-клас ад творцы / Я. Вітко // Патрыёт (Ушачы). – 2016. – 1 чэрв. – С. 3.

4. Денисов, В. И песнями становятся стихи / В. Денисов // Народнае слова. – 2009. – 2 чэрв. – С. 4.

5. Дзянісаў, В. Творчасць не мае мяжы / В. Дзянісаў // Патрыёт (Ушачы). – 2009. – 23 мая. – С. 8.

6. Камаркова, В. Гарыць агеньчык творчасці / В. Камаркова // Патрыёт (Ушачы). – 2019. – 29 мая. – С. 8.

7. Камаркова, В. «Мае творы – мае дзеці» / В. Камаркова // Патрыёт (Ушачы). – 2018. – 18 жн. – С. 5.

8. Карпаў, Р. Святло і смутак душы / Р. Карпаў // Патрыёт (Ушачы). – 2008. – 26 студз. – С. 8.

9. Сауліч, У. Сур'езныя жарты / У. Сауліч // Віцебскі рабочы. – 1998. – 19 верас. – С. 7.

10. Урбан, І. З песні слова не выкінеш / І. Урбан // Віцебскі рабочы. – 1997. – 21 кастр. – С. 3.