Бас Ісідар (Ізраіль Самуілавіч)
Бас Ісідар (Ізраіль Самуілавіч) нарадзіўся 9 снежня 1913 года ў Віцебску ў сям'і рабочага-муляра. Крытык, літаратуразнаўца.
Скончыўшы сямігодку, І. Бас у 1928 годзе пайшоў працаваць вучнем слесара ў трамвайнае ўпраўленне. У 1929–1932 гг. вучыўся на дзённым аддзяленні Віцебскага педагагічнага рабфака. З 1932 года – літсупрацоўнік абласной газеты «Віцебскі рабочы».
У 1936 годзе скончыў Камуністычны інстытут журналістыкі ў Мінску. У 1936–1937 гг. служыў у Чырвонай Арміі. З 1937 года загадваў аддзелам савецкага будаўніцтва газеты «Советская Белоруссия».
У гады Вялікай Айчыннай вайны Ізраіль Самуілавіч быў адказным сакратаром дывізійнай газеты, інструктарам-літаратарам. З 1947 года загадваў кафедрай літаратуры Маладзечанскага настаўніцкага інстытута. Пасля яго ліквідацыі (у 1953 годзе) працаваў старшым выкладчыкам кафедры рускай літаратуры Гродзенскага педінстытута, з 1954 года – старшы выкладчык Брэсцкага педінстытута. З 1958 года – дацэнт кафедры літаратуры і журналістыкі Мінскай вышэйшай партшколы. У канцы 70-х гадоў выехаў за мяжу.
Першыя публікацыі І. Баса з'явіліся ў 1937 годзе. Аўтар кніг па літаратуразнаўстве, у якіх на аснове архіўных матэрыялаў даследуюцца пытанні развіцця беларускай дакастрычніцкай літаратуры, узнаўляюцца невядомыя старонкі творчых біяграфій П. Багрыма, Ф. Багушэвіча, Я. Купалы, Я. Коласа, высвятляюцца абставіны стварэння «Энеіды навыварат» і «Тараса на Парнасе», а таксама даследуецца сувязь беларускай літаратуры з літаратурамі іншых народаў свету (рускага, украінскага, польскага). Шматлікія артыкулы і рэцэнзіі І. Баса друкаваліся ў зборніках і перыядычных выданнях.
Узнагароджаны ордэнамі Чырвонай Зоркі, Айчыннай вайны II ступені.
ЛІТАРАТУРА
1. Бас Ісідар (Ізраіль Самуілавіч) // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1996. – Т. 2 : Аршыца–Беларусцы. – С. 337–338.
2. Бас Ісідар (Ізраіль Самуілавіч) // Беларускія перакладчыкі, даследчыкі, ілюстратары «Слова о плъку Игоревъ» / М. Г. Булахаў. – Мінск : Беларуская навука, 2012. – С. 26–27.
3. Зубараў, Л. І. Бас Ісідар / Л. І. Зубараў, А. Я. Гарадніцкі // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.] ; маст. рэд. В. Г. Загародні. – Мінск : БелЭн, 1992. – Т. 1 : Абуховіч–Ватацы. – С. 260–261.
СПАСЫЛКІ
